УИХ-ын гишүүн Ё.Отгонбаярт холбогдох  бусдаас авлига авахыг  шаардсан хэргийг  УМБГ-т шалгаж байна. Түүний хэргийг Улсын ерөнхий прокурорт танилцуулаад байгаа талаар УМБГ-ын дэд дарга Б.Отгонжаргал мэдээллээ. Харин эхнэр Б.Эрдэнэсолонгын арилжааны долоон банкны  дансаар дамжсан гүйлгээг шалгасан бөгөөд, тодорхой хэмжээний мөнгөн хөрөнгийг битүүмжлээд  байгаа аж. УИХ-ын гишүүн Ё.Отгонбаярын холбогдсон хэргийн талаар эргэн сануулъя. 

2013  оны гуравдугаар сарын 20-ны өдөр иргэн Ч гэгч “Энхтайваны гүүрэн дээр явж  байгаад хэсэг залууст  зодуулж,  машинаа дээрэмдүүллээ” гэх мэдээллийг УМБГ-т ирүүлжээ. Тэрээр цагдаагийн байгууллагад гомдол гаргахдаа “Одоогийн УИХ-ын гишүүн Ё.Отгонбаяр Боловсролын сайд байхдаа миний Налайх дүүрэгт барьсан барилгын зөвшөөрлийг өгөхгүй байсан. Улмаар барилга хүлээн авахдаа  орлогын 4/1 буюу 230 сая төгрөг өгөхийг санал болгосон. Энэ саналыг нь хүлээн аваагүй  учраас бүлэг залуусаар зодуулж, Ланд-200 машиныг нь дээрэмдүүллээ”  гэжээ. Иргэн Ч-гийн гаргасан гомдлын хүрээнд мөрдөн  шалгах ажиллагаа явуулахад  дээрх мэдээллүүд нь батлагдсан бөгөөд Ё.Отгонбаяр бусдаас авилга авахыг  шаардсан  холбогдох баримтуудаар нотлогдсон байна.