АНУ-ын иргэн Жон Мартин Кийнийг эх орондоо дагуулан ирж, шунахайн зорилгоор буудан хөнөөсөн Ч.Баттуулын хэргийг өнөөдөр Цагдан хорих 461 дүгээр ангид шүүж, шийтгэлээ.  Сонгинохайрхан дүүргийн шүүхээс Ч.Баттуулд 23 жилийн хорих ял, хэргийн нуун дарагдуулсан гэгдэх Ж.Батчулуун, Д.Отгонбаяр нарт тус бүр хоёр жилийн хорих ял оноосон байна. Ингэхдээ Ж.Батчулууны ял эдлэх хугацааг тодорхой шалтгааны улмаас нэг жилээр хойшлуулжээ.

Ч.Баттуул нь АНУ-аас өөрийн багш Жон Мартин Кийнийг их хэмжээний бэлэн мөнгөтэй эх орондоо авчраад шунахайн сэдлээр нийслэлд ирснийхээ маргааш нь буюу 2011 оны нэгдүгээр сард Төв аймгийн Эрдэнэ сумын нутагт аваачин, буудаж хөнөөсөн гэдгийг мөрдөн байцаалтын явцад тогтоосон. Улмаар Ч.Баттуул нь хохирогчийн өмнөөс “Би Монголд байгаа, завгүй байна” гэхчилэн хоёр сарын турш ээжтэй нь фэйсбүүкээр харилцсан гэх ч мэдээлэл бий. Талийгаач Жон Мартин Кийний ээж нь Монгол дахь АНУ-ын элчин сайдын яаманд “Миний хүүг эрэн сурвалжилж өгнө үү” гэх хүсэлт илгээснээр уг хэргийг шалгаж эхэлсэн байдаг. Талийгаачийн цогцсыг гуравдугаар сард Төв аймгийн Эрдэнэ сумын нутаг, Цонжин болдгийн орчмоос олсон юм.

Ч.Баттуулын хүний аминд хүрсэн гэх хэрэгт түүний найзууд гэгдэх Ж.Батчулуун, Д.Отгонбаяр нарыг хамсаатан буюу гэмт хэргийг нуун далдлахад оролцсон буюу цогцосыг зөөвөрлөж булсан гэх үндэслэлээр  буруутгасан байна.