УИХ-ын чуулганы нэгдсэн хуралдаанаар Төрөөс мөнгөний бодлогын талаар 2014 онд баримтлах үндсэн чиглэл батлах тухай УИХ-ын тогтоолын төслийн хоёрдугаар хэлэлцүүлгийг хийж, ажлын хэсгээс оруулж ирсэн зарчмын зөрүүтэй саналын томъёолоор санал хураалган, дуусгалаа. Ингэснээр тус тогтоолын төслийг эцсийн хэлэлцүүлэгт бэлтгүүлэхээр УИХ-ын Эдийн засгийн байнгын хороонд шилжүүлэв. УИХ-ын чуулганы нэгдсэн хуралдаанаар хэлэлцэх асуудал ийнхүү дууссан тул хуралдааныг өндөрлүүллээ.  Харин маргааш болох УИХ-ын чуулганы нэгдсэн хуралдааны цагийг жич зарлахаа УИХ-ын дарга мэдэгдлээ. Энэ нь УИХ-ын Эдийн засаг, Төсвийн байнгын хороод үдээс өмнө хуралдах болж байгаа учраас түүнээс шалтгаалж чуулганы нэгдсэн хуралдааны цаг товлоход бэрх байгаа бололтой.