“Ногоон хатагтай” буюу Үндэсний цэцэрлэгт хүрээлэнгийн захирал
Б.Саранчимэг “Ногоон ном”-оо олны хүртээл болгожээ. Дэлхийд нэгд орох
томоохон цэцэрлэгт хүрээлэнг барихаар ажиллаж буй энэ эмэгтэй, “Эх
дэлхийгээ ижий шигээ хайрладаг, Түүхт өв уламжлалаа үнэн зүйл хэмээн
эрхэмлэсэн, Эгэл нэгт эрдэнэт  хүмүүн танд зориулав” хэмээн номын нүүрэн
дээр шигтгэсэн байна.

Үндэсний цэцэрлэгт хүрээлэн 1280 га
газартай. Ийм том газартай цэцэрлэгт хүрээлэн дэлхийд байхгүй.
Б.Саранчимэг дарга дэлхийд том тооцогдох цэцэрлэгт хүрээлэн барьж
байгаа  гэж ярихаар тухайн үед итгэх хүн  тун ч цөөхөн байсан. Гэхдээ
өнөөдөр байдал эсрэгээрээ. Нийслэлчүүдийн очиж, зугаалах, амрах дуртай
газрын нэг нь энэ газар болоод байна.

Нийслэлийн агаарын
бохирдол, хөрсний элэгдэл, усны урсацад хувь нэмэр болж буй энэ
цэцэрлэгт хүрээлэнгийн дарга үнэхээр эх дэлхийгээ хайрласан, ногоон
ирээдүйг бий болгохоор зорьж, зориглож буйгаа илэрхийлж, энэхүү номоо
гаргасан бололтой.