Сагсан бөмбөгийн Үндэсний супер лигийн тэмцээн энэ сарын 22-нд эхлэх гэж байна. МҮСБХ-ноос зохион байгуулах лигийн тэмцээнд энэ жил өнгөрсөн улирлын аварга “Дорнод Танан Гарьд” болон “SBL Хүлгүүд”, “Увс Эрдэнэдрийлинг Ригс”, “Баянзүрх Их Өргөө Аравтууд”, “Альянс Тех Харцага”, “TLG-13”, “Говь-Алтай Монторх” гэсэн долоон баг өрсөлдөх аж. Эдгээрээс “Баянзүрх” болон “Харцага” багуудын ивээн тэтгэгч байгууллагууд өөрчлөгдсөн тул нэрээ ч мөн өөрчилсөн байна. Мөн Спрайт супер лигийн өнгөрсөн улирлын аварга “Монторх” дээд лигт дэвшин тоглох болжээ.

Багуудын бүрэлдэхүүний хувьд монгол тоглогчид нь ямар нэг шилжилт хөдөлгөөн байхгүй, энэ улирлыг дуустал хуучин багуудтайгаа гэрээтэй байгаа. Харин легионеруудын хувьд багууд тамирчдаа лиг эхлэхээс өмнө авчирч, бэлтгэл сургуулилтаа эхлүүлээд байна. “Эрдэнэдрийлинг Ригс” багт өнгөрсөн улиралд тоглосон Хадли, Скиннер, “Танан Гарьд” багт Фредди Вүүдс, “TLG-13” багт Крис Лаусон нар тоглох юм. Түүнчлэн “Баянзүрх” болон “Харцага” улирлын явцад легионер тоглогчдоор хүч зузаатгах гэнэ.

Энэ удаагийн Үндэсний супер лигийн тэмцээнийг МҮСБХ-ноос ССАЖЯ-тай хамтран зохион байгуулна.

Лигийн тэмцээнийн эхний тоглолт энэ сарын 22-нд 18:00 цагт Спортын төв ордонд болно. Уламжлал ёсоор өнгөрсөн улирлын аварга “Танан Гарьд” баг лигийг нээж, “SBL Хүлгүүд”-тэй тоглох юм.