НҮБ-ын Ерөнхий ассамблейн хуралдаанаар өчигдөр /Х.12/ Хүний эрхийн зөвлөлд Хятад, ОХУ, Саудын Араб, Вьетнам, Куба, Алжир зэрэг орныг шинэ гишүүнээр  сонгосон нь бусад хүний эрхийн ажиглагчдын шүүмжлэлтэй тулгарчээ. Хүний эрхийн ажиглагчдын зүгээс Хятад, ОХУ, Саудын Араб, Куба зэрэг хүний эрхийг ихээр зөрчдөг орнууд НҮБ-ын Хүний эрхийн зөвлөлд гишүүнээр сонгогдсоныг хурцаар шүүмжилсэн байна.

47 гишүүнээс бүрдэх Хүний эрхийн зөвлөлд нийт 14 шинэ гишүүнийг сонгосон аж.  Женевт байрлах НҮБ-ын гол байгууллагуудын нэг Хүний эрхийн зөвлөлд дээрх зургаан орноос гадна Их Британи, Мальдив, Македон, Мексик, Морокко, Намби, Өмнөд Африк зэрэг улсууд гурван жилийн хугацаатай сонгогджээ.

НҮБ-ын Ерөнхий ассамблейн хуралдаанаар гишүүн 193  орны төлөөлөгчдийн дунд нууц санал хураалт явуулан Хүний эрхийн зөвлөлийн шинэ гишүүдийг тодруулсан аж.

Үүний зэрэгцээ өчигдөр НҮБ-ын удирдлагуудын байрны гадна Түвдийн идэвхитнүүд  цуглан Хятад улс Хүний эрхийн зөвлөлд сонгогдсоныг эсэргүүцэн жагсаал зохион байгуулжээ. Хүний эрхийн асуудал НҮБ үүсгэн байгуулагдах үндсэн шалтгаануудын нэг билээ.