“Нарантуул-2” худалдааны төвийн хоёрдугаар давхарт өнгөрсөн бямба гаригийн /2013.11.09/ шөнө гал гарч, 100 орчим түрээслэгчийн бараа, эд хөрөнгө шатаад байгаа билээ. Өнөөдөр цагдаагийн байгууллагаас түрээслэгчдийг зах руу оруулж, шатаагүй барааг хүлээлгэн өгч, бараа нь шатсан иргэдийн хохирлын хэмжээг тогтоож эхэлсэн байна. Энэ талаар “Нарантуул-2” захын ерөнхий эмч Д.Гантөмөрөөс тодрууллаа.

-Ямар учраас түрээслэгчдийг шатсан захад оруулж байгаа вэ?

-Шатсан захын хоёрдугаар давхрыг цэвэрлэж, засвар хийхээр болсон. Тиймээс цагдаагийн байгууллагаас бараа нь бүрэн шатсан иргэдийн хохирлын хэмжээг тогтоож, бараа, эд хөрөнгө нь шатаагүй түрээслэгчдийн барааг буцаан олгож байна.

-Түрээслэгчдийн барааг өгч эхэлсэн гэхээр гал гарсан шалтгааныг тогтоосон гэсэн үг үү?

-Гал гарсан шалтгааныг тодруулахаар цагдаагийн ажилчид болон галын шинжээчид ажиллаж байгаа. Галын дүгнэлт гараагүй байна. Манай захын зүгээс галыг бол цахилгаанаас болж гараагүй, гадны нөлөөтэй байх гэж бодож байгаа.