УИХ-ын гишүүн Р.Амаржаргал бүрэн эрхээсээ татгалзах хүсэлтийг УИХ-ын даргад хандан тавьсан нь гишүүн болох мөрөөдөлтнүүдийг хөдөлгөөнд оруулжээ. Хэрэв УИХ-аас Р.Амаржаргал гишүүний бүрэн эрхийг түдгэлзүүлбэл, МАН-аас Сүхбаатар дүүрэгт нэр дэвшин өрсөлдөөд унаж байсан Сангийн дэд сайд асан Ч.Ганхуяг, Нийслэлийн Засаг даргын орлогч Ч.Цогзолмаа нар дахин тоосоо өргөх бол, Ардчилсан намаас О.Магнайгийн нэр дуулдаж эхлэв.

Шударга өрсөлдөөн, хэрэглэгчийн төлөө газрын даргаар томилогдсоноос хойш сенсаци тарихдаа гаршиж байгаа О.Магнай намынхаа удирдлагуудад энэ санаагаа ойлгуулах гэж нэлээд чардайж буй юм байх. Харин удирдлагууд нь хүлээж авах эсэхийг мэдэхгүй юм. Монгол Улсын Ерөнхий сайдын алба хашиж, УИХ-д хэдэнтээ сонгогдож байсан Р.Амаржаргал гишүүнтэй О.Магнайг бол харьцуулахын аргагүй, түүний дэргэд тэр жулдана. Тиймээс эрх баригчид өрсөлдүүлэхдээ тулбал өөр хувилбар ч гаргаж ирэх юм билүү хэн мэдлээ.