УИХ-ын гишүүн Р.Амаржаргал гишүүнийхээ бүрэн эрхээс түдгэлзэх хүсэлтийг өчигдөр УИХ-ын даргад хандан тавьсан билээ. Хуульд зааснаар энэ асуудлыг УИХ хэдий хугацаанд хэлэлцэн шийдвэрлэх ёстой, мөн сонгогдсон тойрогт нь нөхөн сонгууль явуулах уу зэрэг асуултад УИХ-ын Төрийн байгуулалтын байнгын хорооны дарга А.Бакейгээс хариулт авлаа. 

-Р.Амаржаргал гишүүн бүрэн эрхээсээ түдгэлзэх хүсэлтийг гаргалаа. Төрийн байгуулалтын байнгын хороо хэзээ энэ асуудлыг хэлэлцэх вэ?

-Хуульд бол УИХ-ын гишүүн бүрэн эрхээсээ түдгэлзэх өргөдөл өгснөөс хойш төдий хугацаанд УИХ-аар хэлэлцэнэ гэсэн заалт байхгүй. УИХ-аар 2014 оны төсвийг баталсны дараа энэ асуудлыг хэлэлцэнэ.

-Өргөдөлдөө Р.Амаржаргал гишүүн Монгол Улсын Их хурлын тухай хуулийн 6 дугаар зүйлийн 6.6.3-т заалтыг үндэслэн бүрэн эрхээсээ татгалзаж байна гэж тодотгосон байсан. Яг ямар үндэслэлийг иш болгосон заалт юм бэ?

-Хүндэтгэн үзэх шалтгаанаар гэсэн утгатай заалт юм.

-УИХ-аас бүрэн эрхийг нь түдгэлзүүлбэл Сүхбаатар дүүрэгт нөхөн сонгууль явуулах уу. Эсвэл шууд дараагийн нэр дэвшигч нь УИХ-д орж ирэхээр байгаа юу?

-Эхлээд өргөдлийг нь УИХ-ын Төрийн байгуулалтын байнгын хороо, дараа нь УИХ-ын чуулганы нэгдсэн хуралдаанаар хэлэлцээд гишүүдийн олонхи нь дэмжиж хүлээн авах шийдвэр гаргах юм бол 14 хоногийн дараа нөхөн сонгууль зарлаад, 30 хоногийн дотор нөхөн сонгуулийг зохион байгуулах хуулийн заалт бий.

-Тойрогт сонгогдсон гишүүн "Намын нөхдөд хариуцлага тооцохгүй байна" гэх үндэслэлээр бүрэн эрхээсээ татгалзах нь хэр зохистой шийдэл вэ. Олон мянган сонгогчийнхоо итгэлийг хүндэтгэн үзэх шалтгаанаар гэж хөсөрдүүлж болох уу?

-Асуудлыг хэлэлцээд эхлэхээр хүндэтгэх шалтгаан гэдэгт гишүүн маань тайлбар хэлж таарна. Тойргоос сонгогдсон гишүүн бол маш олон мянган сонгогчийн итгэл үнэмшлээр УИХ-ын гишүүн болсон.  Хэдийгээр улстөрийн үүднээс тийм шийдвэр гаргаж байгаа ч гэсэн сонггочийн саналыг бодолцох байх. Нөгөө талдаа намын төвшинд яригдах ёстой асуудал гэж бодож байна.

-Өмнө нь ийм тохиолдол гарч байсан уу?

-Ц.Шаравдорж гишүүний бүрэн эрхийг түдгэлзүүлэх асуудал УИХ-аар хэлэлцэгдэж байсан юм билээ, гэхдээ УИХ-аас хүсэлтийг нь хүлээж аваагүй тул гишүүнээрээ үлдсэн байдаг юм билээ. Тийм учраас Р.Амаржаргал гишүүний бүрэн эрхийг түдгэлзүүлэх эсэх тухай эцсийн шийдлийг УИХ гаргана гэж ойлгоорой.