Сүмогийн башё эхлэхийн өмнө аваргуудын бэлтгэл сүмо сонирхогчдын анхаарлыг зүй ёсоор татдаг билээ. Тэгвэл кюүшюү башё ойртох тусам сүмочид бэлтгэлээ жигдрүүлж, сэтгэлзүйгээ бэлтгэж эхэлжээ. 70 дахь аварга Харүмафүжи уржигдар оозэки Кисэносатогийн дэвжээнд очиж бэлтгэл хийсэн байна. Харин Кисэносато ирээгүй аж. Тэрээр үүнд ундууцан “Би тэмцээний өмнө үргэлж Кисэносатотой барилдаж, бэлтгэлээ базаадаг. Энэ удаад ч түүнийг хүлээлээ. Гэвч тэр ирсэнгүй. Бодвол түүний бэлтгэл тийм сайнгүй байгаа юм байлгүй дээ. Тэр энэ башёд тийм ч сайн амжилт үзүүлэх болов уу” гэж хэлжээ. Түүнийг ийн мэдэгдэл хийж байх хооронд оозэки Кисэносато “Сакаигава” дэвжээнд очиж, сэкивакэ Гоэйдотой барилдсан байна. Тэд 21 удаа барилдахад Гоэйдо 11 давжээ.

Харин мэргэжлийн сүмогийн 69 дэх их аварга Хакүхо “Сирокояма” дэвжээнд бэлтгэл хийжээ. Тус дэвжээний Хомашо, Сэйро нартай нийтдээ 27 удаа барилдахдаа Хакүхо бүгдэд нь давжээ. Тэрээр башё эхлэхийн өмнөх өдөр “Сакаигава” дэвжээнд очиж өнгөрсөн сарын барилдаанд өөрийг нь унагасан сэкивакэ Гоэйдотой барилдахаар төлөвлөж буйгаа ярьсан байна. Түүнээс сэтгүүлч бөхчүүдээс хэнээс нь эмээж буйг асуухад Хакүхо ингэж хариулжээ.

“Одоогоор яг эн зэрэгцэх төвшний бөх алга байна. Гэхдээ өнгөрсөн сард дээд зиндаанд дэвшсэн Эндо гэмтэл авалгүй, цаашид хөдөлмөрлөх юм бол өрсөлдөгч болж магадгүй. Би энэ өдрийг хүлээх болно. Миний хувьд 68 дахь их аварга Асашёорюүгаас л айдаг байлаа. Би түүнтэй барилдахаар дэвжээнд гарахдаа энэ барилдаанаас амьд гарч чадах л байгаа даа гэж өөрөөсөө асуудаг байсан” гэжээ. Их аварга Хакүхо, 70 дахь аварга Харүмафүжи нар маргааш хамтарсан бэлтгэл хийж магадгүй талаар Японы “Майничи” сонинд мэдээлсэн байна.