Аливаа улс орон өөрийн улсдаа элбэг байдаг, тэр ч хэрээр иргэд нь түлхүү хэрэглэдэг бүтээгдэхүүнийг хянаж хууль гаргадаг болжээ. Тухайлбал Монголд архи, тамхи элбэг байсан учраас Тамхины хяналтын тухай хуулийг нэр бүхий гишүүн санаачлан батлуулж хэрэгжүүлсэн. Одоо Архины хяналтын тухай хуулийг батлуулах гэж байгаа. Архи, тамхи хүний биед маш хортой гэдгийг хүн бүр мэднэ. Тэгвэл эдгээртэй адил хэмжээний хортой, тэгсэн мөртлөө гарт баригдаж, нүдэн үзэгдэхүйц хор нөлөөтэй бүтээгдэхүүнийг гадаадын улс орнууд хориг­лож эхэлсэн байна. Тод­руулбал Мексик улсын Ерөн­­хийлөгч Энрике Пеня Ньето иргэддээ хандан хэт таргалалттай тэмцэж, турахыг уриалсан байгаа юм. Ингэхдээ Мексикийн Конгресс нүүрс ус ихтэй түргэн хоол, сахар ихтэй гаазтай ундаа зэрэг хүнсний бүтээгдэхүүнээс татвар авах хууль баталсан байх жишээтэй. Хуулийн дагуу холбогдох албаныхан эрүүл мэндэд ач холбогдолгүй хүнсний бүтээг­дэхүүний жагсаалтыг гаргаж, сурталчилгааг нь хязгаарлах арга хэмжээ авч эхэлжээ.

Тэгэхээр Мексик улс тар­галалттай тэмцэж, хүний биед хортой хүнсний бүтээг­дэхүүнүүдийг хориг­лосон. Харин Монгол Улс архи, там­хитай тэмцэж бай­гаагаас үзвэл аливаа улс орон өөрт их байгаа зүйлээ хориглож байгаа юм шиг. Нөгөөтэйгүүр Мексик улс хлострен ихтэй, өөрөөр хэлбэл таргалуулах бүтээгдэхүүнээс татгалзаж буй бол манай улс эсрэгээрээ эцээж тураадаг архи тамхинаас татгалзаж бай­на. Тиймээс манай улс тус улсын хориглосон зүйлийг өөр­ийн иргэддээ нээлттэй бол­гож, хориглоод буй тамхи, хориглох гэж буй утаат тамхиа Мексикийн ард иргэдийн маш ихээр хэрэглэхийг уриалбал зүгээр ч юм шиг. Хэрвээ хориглож буй хэрэглээгээ солиод хориглох бус харин хэрэглэхийг хөхиүлэн дэмжвэл манайхан ёстой янзтай харагдана. Гудамжаар нэг том биетэй хүмүүс алив наашаа, алив цаашаа гээд л үнэхээр гоё. Ядаж цэрэгт явах насны эрчүүд маань жин хүрсэнгүй гэдэг шалтгаанаар эр цэргийн албанаас хасагдахгүй. Харин жин хэтэрсэн гээд зогсож байвал сүртэй харагдана шүү дээ.