УИХ дахь МАН-ын бүлэг өнөөдөр хуралдаж, УИХ-ын  чуулганаар энэ долоо хоногт хэлэлцэх асуудлын талаар зарчмын санал гаргасан байна. УИХ-ын чуулганы нэгдсэн хуралдаан, байнгын хороодоор 2014 оны Төсвийн тухай хуулийн төсөл, түүнийг дагалдах хуулиудыг хэлэлцэх гэж буйтай холбогдуулан тус намын бүлгээс ажлын хэсэг гарч, АН-ын бүлэгтэй тодорхой асуудлуудаар санал солилцож,  нэгдсэн ойлголтод хүрэхээр ажиллаж байгаа гэдгийг МАН-ын бүлгийн дэд дарга С.Бямбацогт, УИХ-ын гишүүн Д.Оюунхорол нар танилцууллаа. Мөн УИХ, МАН-ын бүлгээс Үндэсний аудитын газарт үүрэг чиглэл өгсний дагуу хийсэн ажилтай нь танилцсан байна. Үндэсний аудитын газар төсвийн хөрөнгө оруулалтын ажлуудын өртөг хаана нэмэгдсэн, ямар шалтгаантай байсан  талаар судалсан байна.  

Түүнчлэн МАН-ын бүлгээс төгрөгийн худалдан авах чадвар 30 хувиар буурсан, өргөн хэрэглээний бараа бүтээгдэхүүний үнэ тэнгэрт хадсан энэ үед төрийн албан хаагчдын цалин, тэтгэвэр тэтгэмжийг 30 хүртэлх хувиар нэмэгдүүлэх шаардлагыг Засгийн газарт тавихаар болжээ. 2014 оны төсөвт  цалин тэтгэврийг нэмэгдүүлэхэд  200 орчим тэрбум төгрөг төсөвлөсөн. Энэ нь төрийн албан хаагчдын цалинг 8-10 хувиар нэмэгдүүлэх  боломжтой гэсэн үг. Гэтэл шүүгчдийн цалинг 2-4 сая төгрөгөөр нэмэгдүүлэхээр Шүүхийн ерөнхий зөвлөлөөс оруулж ирсэн нь ойлгомжгүй байдал үүсгэж байгааг дурдлаа. Өөрөөр хэлбэл, шүүгч нарын цалинг  нэмэгдүүлэх эх үүсвэр нь тодорхойгүй байгаа аж. Мөн "Чингис" бондын мөнгийг Монгол Улсын өр гэж үзвэл зайлшгүй төсөвт тусгаж байж 2014 оны төсвийн хуулийн хоёр дахь хэлэлцүүлгийг хийх  хэрэгтэй гэж үзсэн байна.