Байт харвааны 18 дахь удаагийн насанд хүрэгчдийн Азийн аварга шалгаруулах тэмцээн Тайваны Тайпей хотноо энэ өдрүүдэд үргэлжилж байна. Насанд хүрэгчдийн тэмцээнтэй хамтатган өсвөрийн Азийн АШТ болон Залуучуудын олимпид оролцох эрхийн тэмцээн давхар зохиогдож байна.

Охидын рекурв (60 метр) төрөлд өрсөлдсөн “Хангарьд” клубын тамирчин, спортын дэд мастер Чимэдцэрэнгийн Оюунтунгалаг хүрэл медаль хүртлээ. Багийн дасгалжуулагчаар Т.Цогтбаяр ажиллаж байна.

Охидын рекурв зайд 19 тамирчин оролцсон бөгөөд шигшээ харваа өчигдөр болж, медальтнууд тодорлоо. Энэ зайд Казахстан, Филиппиний тамирчид алт, мөнгөн медаль хүртсэн бол Монгол улсын Ч.Оюунтунгалаг хүрэл медаль хүртлээ. Одоогоор ирэх онд БНХАУ-ын Нанжиньд болох Залуучуудын олимпийн наадамд оролцох эрх хэдэн тамирчид олгосон нь тодорхой болоогүй байна.

Ч.Оюунтунгалаг урьдчилсан харваанд 568 оноогоор 11-р байраар шалгарч, 1/16-д хийлсэн. Улмаар Сингапур, Казахтаны тамирчныг хожиж, хагас шигшээд шалгарлаа. Мөнгөн медалийн төлөө урьдчилсан харваанд хоёрдугаар байраар шалгарсан Филиппиний Биансд 2:6-аар ялагдсан ч, хүрлийн төлөө Малайзын тамирчинг 7:3-ийн харьцаагаар буулган авчээ. Охидын азийн аваргад гурван тамирчин өрсөлдсөнөөс А.Сүрэнжав, Б.Номин-Эрдэнэ нар 1/8-д шалгарсан амжилтыг үзүүллээ.

Харин насанд хүрэгчдийн тивийн аваргад өрсөлдөж буй манай тамирчид маргааш шийдвэрлэх харваагаа хийнэ. Рекурв зайд өрсөлдөж буй эмэгтэй, эрэгтэй баг шилдэг наймд шалгарсан. Рекурвийн эмэгтэй урьдчилсан харваанд 47 тамирчин оролцсоноос ОУХМ
Б.Урантунгалаг 629 оноогоор 19-р байр, ОУХМ А.Энхтуяа 624 оноогоор 21-р
байрт, ОУХМ Д.Мирослоава 671 оноогоор 21-р байрт шалгарсан.

Рекурвын
эрэгтэй урьдчилсан харваанд 49 тамирчин оролцсоноос ОУХМ Ж.Гантөгс 663
оноогоор 7-р байр, ОУХМ Б.Долгорсүрэн 632 оноогоор 25-р байр, ОУХМ
Г.Ган-Эрдэнэ 617 оноогоор 35-р байрт тус тус шалгарсан. Эмэгтэй болон
эрэгтэй тамирчид бүгд 1/16-д шалгараад байна.