Цахим ертөнцөд МАН “од” болж байна. МАН-ынхан их хурлаа хийж, дарга, генсекээ сонгосон биш нэг нэгнийхээ булхайг дэлгэж, дотроосоо өтсөнөө дэлгэж эхлэв. МАН-ын нарийн бичгийн дарга асан Ж.Сүхбаатар намынхаа генсек болж чадаагүйдээ хорсож намын гишүүн Т.Бадамжунайг "Авлигын загалмайлсан эцэг" хэмээн олон нийтийн мэдээллийн хэрэгслээр зарлаж, олныг шуугиалаад авав. Нэг ёсондоо Т.Бадамжунай бол МАН-ын шинэ дарга М.Энхболдтой нэг фракц, тиймээс М.Энхболд бол авлигач гэж хэлсэнтэй утга нэг үгийг тэр нийгэмд цацаж орхилоо. Ийн их шуугиан дуусаагүй байтал МАН-ын нарийн бичгийн даргад өрсөлдсөн эрхмүүд ч нэг нэгнийгээ мэрж эхэлжээ.

Тухайлбал, жиргээний ертөнцөд “Оддын охин” нэрээр танигдсан Онон гэгч МАН-ын Мэдээлэл, технологийн хэлтсийн дарга Б.Цогтгэрэлд хандан, “Хэрвээ би НБД болсон бол манай намыг хамгийн муухай харагдуулагч @TsogtgerelB-г хамгийн түрүүнд явуулах байсан. Тэр мэдээд ямар их тэвдэв ээ” хэмээн жиргэх нь тэр. Тэрчлэн МАН-ын Орон нутаг, намын байгуулалт хариуцсан нарийн бичгийн даргаар сонгогдсон Х.Булганчимэг нь “Намынхаа хурал дээр Энхбаяр даргатай хамтарч ажиллах болсондоо баяртай байна” гэж хэлсэн нь ч цахим ертөнцөд шуугиан дэгдээж орхив. Энэ мэтээр “шинэчлэгдсэн” МАН-ынхан их ялагдлын дараах ялагдлаа зөгнөж эхлэв үү гэмээр үйлдэл гаргаж байна.