УИХ-ын гишүүн С.Эрдэнэ Нийгмийн хамгаалал, хөдөлмөрийн сайд Т.Гандид асуулга тавьсан байна. Асуулгад “Гадаадад ажиллах хүч илгээх төв” ХХК нь 2010 оны тавдугаар сарын 17-19-ний өдрүүдэд Бүгд Найрамдах Солонгос улсад гэрээгээр ажиллах сонирхолтой иргэдийг солонгос хэлний шалгалтад оруулахаар бүртгэж, бүртгэлийн хураамж болох 26 мянган төгрөгийг ХААН банкны 5111008464 тоот дансанд тушаасан бөгөөд хүлээн авагч нь Солонгос улсын иргэн /YOU MYEOUNG SOO/ байна. Бүртгэлийн хугацаанд Улаанбаатар хотын хэмжээнд 10757 иргэн бүртгүүлж нийт 279 682 төгрөг дээрх дансанд хуримтлагдсан тооцоо байна.

Бүгд Найрамдах Солонгос улсад ажиллуулах нэрээр жил бүр дээрх арга  хэмжээг зохион байгуулж иргэдээс шат дараалсан олон төрлийн хураамж авч бүртгээд хуримтлагдсан мөнгөн хөрөнгө хэрхэн зарцуулагдаж байгаа талаар ямар ч мэдээ, мэдээлэл, тайлан, тооцоо өнөөдрийг хүртэл байхгүй байна. Иймд хураамжийг хүлээн авагч нь яагаад Солонгос Улсын иргэн байдаг, Монгол Улсын хууль тогтоомжийн дагуу татвар, хураамж төлдөг эсэх, ямар эрх зүйн үндэслэлээр ямар байгууллага, албан тушаалтны шийдвэрээр уг хураамжийг иргэдээс хураадаг талаар болон урд жилүүдэд төлбөрөө төлж, шат дараалсан шалгалтуудад тэнцсэн хэдий ч одоог хүртэл явж чадаагүй байгаа иргэдийн тухай мэдээлэл, судалгаа /он тус бүрээр/, тэдний талаар авч хэрэгжүүлсэн арга хэмжээ, үр дүн,  цаашид хийх ажлын талаар дэлгэрэнгүй мэдээлнэ үү. 

Асуултын хариуг УИХ-ын тухай хуульд заасан хугацаанд бичгээр ирүүлж улмаар Нийгмийн бодлого, боловсрол, соёл, шинжлэх ухааны байнгын хорооны хуралдаанд сонсгохыг Танаас хүсье” гэсэн байна.

Г.Дарь