“Бридж” группийн гүйцэтгэх захирлын албан тушаалд очоод удаагүй байгаа УИХ-ын гишүүн асан Ц.Сэдванчиг шинэ төрлийн бизнес эрхлэх болсон тухайгаа өөрийн твитер хуудсаар дамжуулан мэдэгджээ. Энэ нь эко жимс, хүнсний ногоог нийслэлчүүдэд нийлүүлэхээр бизнесийн ажлаа эхлүүлсэнтэй нь холбоотой аж. Тодруулбал, С.Баярыг Ерөнхий сайдын алба хашиж байх үед Монгол Улсын Засгийн газар, Япон улсын Засгийн газар хамтран Ядуурлыг бууруулах, ажлын байр олноор бий болгох төсөл хөтөлбөрийн хүрээнд дээрх ажлыг эхлүүлэхээр болж шийдвэрлэж байсан аж. Төслийн хүрээнд одоо “ЖАЙКА”-гийнхан судалгаа хийж байгаа бол “Бридж” групп, Японы “Фарм До” групптэй хамтран хоёр ч газарт ажлаа эхлүүлсэн байна. Одоогоор жимс тариалах ажил үрсэлгээний шатандаа яваа аж.

Фарм До” группийн хувьд жимс, хүнсний ногоо тариалах ажилд гаршсан групп юм байна. Японд тус группийн 5000 орчим хоршоолол дээрх чиглэлээр дагнан үйл ажиллагаа эрхэлдэг, байгалийн цэвэр бүтээгдэхүүнийг хүн амын хүнсний хэрэглээнд нийлүүлдэгээр дэлхийд танигдсан төдийгүй дэвшилтэт технологи ашигладаг аж. Тиймээс дээрх төсөл хэрэгжсэнээр Монголд шинэ технологи нутагших төдийгүй байгалийн цэвэр бүтээгдэхүүнээр нийслэлчүүдийн хүнсний хэрэглээг хангах бололцоо бүрдэх юм байна.

Ийнхүү монгол хүний гараар тарьж ургуулсан нарийн ногоо, гүзээлзгэнэ, үхрийн нүд зэрэг органик бүтээгдэхүүнүүд удахгүй нийслэлчүүдийн хүнсний хэрэгцээнд зориулагдан нийлүүлэгдэх болж байна.

Монголд өнөөдөр жимс, нарийн ногоо олноороо зарагдаж байгаа ч гол төлөв химийн бордоогоор бордож ургуулсан импортын бүтээгдэхүүн голлож буй. Дээрх төсөл үр шимээ өгснөөр монголын хөрсөнд тарьж ургуулсан байгалийн цэвэр бүтээгдэхүүн хүнсний хэрэгцээнд нийлүүлэгдэх бололцоотой болно.