Хоёр Солонгосын хувьд нэгдэл гэдэг гоё үг мэт боловч хэзээ ч бүтэхгүй мэт тийм үг. Хэрвээ тэд аль аль нь үүнийг хүсч байсан бол Ким Де Жуны үед нэгдчихээр байсан. Магадгүй түүнээс өмнө ч байж болох байсан. Тэд тэгээгүй. Тиймээс өмнөд нь нутгаа хамгаалж, барууныхантай нэгдэн, хойд нь айлган сүрдүүлж, барууныхнаас тусламж хүсдэг тийм дүр зураг хоёр Солонгосын одоогийн байдлыг чимсээр олон намрын нүүрийг үзжээ. Хамгийн сүүлд тэд байлддаг дээрээ тулаад хэлэлцээр хийсэн. Одоо бол хойдчууд хэсэгтээ л дуугүй байж, өмнөдүүд хэлэлцээр хийх гэж мэтгэсэн тийм л байдалтай байгаа. Гэхдээ нэгдэл гэх үг аль хэдийнэ Солонгосын хойгоор салхилаад эхэлсэн. Хаанаас гээч. Хойд зүгээс…

Ким Жон Ун 2020 гэхэд хоёр Солонгос нэгдэнэ. Үүний эхлэлийг 2014 оноос тавина. Тэд энэ үйлдлийг хүчээр хэрэгжүүлэх бөгөөд үүнд бэлдэх асуудал 2012 оноос эхэлсэн байна. Энэ бол Өмнөдийн тагнуулын албанд ирсэн мэдээлэл аж. Тэрхүү мэдээллийг дэлхийн хэвлэлүүд мэдээлснээс хамгийн өргөн хүрээнд мэдээлсэн нь Bloomberg телевизийнхэн байлаа. 1980-аад онд Хойдчуудын зүгээс нэгдлийн тухай яриа хөөрөөг анх гаргаж эхэлсэн. Тэд хүчээр нэгтгэх бодлогын тухай хэлэлцэж байсан ч тухайн үед тэртээ тэргүй хүйтэн дайн өрнөж, нэгдэх асуудал цаанаасаа дарагдсан юм. Хэдийгээр тэд дайрч болох байсан ч зөвхөн энэ л шалтгаан дэлхийн хэмжээний хямралыг дагуулах хүчтэй байлаа. ЗХУ болон БНХАУ-аас хэтэрхий их хамаарч байсан хойдчууд тэдний нөлөөнд автагдаж таг болсон. Хэд, хэдэн генералууд хүчээр дайрах байр суурь дээр хатуу зогссон ч амжилтыг эс олн өөрсдөө улстөрийн хоригдолын дүрээр үлдсэн амьдралаа өнгөрөөсөн билээ. Үүнээс хойш хойдчууд дуугүй байсаар ирсэн. Энэ хооронд өмнөдүүд нэгдлийн тухай ярьж байсан ч хойдчууд хойрголоод болоогүй. Гэтэл 2008 онд дуугүй байсан хойдчууд нэгдлийн хаалга нэртэй том хөшөөг ашиглалтад оруулж, дэлхий нийтийн анхаарлыг өөр дээрээ татав. Магадгүй өмнөдүүд ч гайхсан байх. Энэ байдлаар далимдуулан өмнөдүүд хэлэлцээр зохиох гэсэн ч хойдчууд бас л хөдөлгөөнгүй байсан билээ.

Цаг хугацаа өнгөрсөөр Ким Чен Ир бурханы оронд заларч нялх удирдагч хойдчуудын толгойд гарав. Дэлхий дахин одоо яах бол гэж харж байсан. Залуу удирдагчийг сэнхрүүлж байгаад хоёр солонгос нэгдэх үү, эсвэл том хэмжээний дайн гарах уу гэж. Тэр засаглалынхаа эхний жилд дэлхий нийтэд том анхааруулга өгч бүтэн дөрвөн сарын туршид дэлхий нийтийг айдас хүйдэст автуулсан. Энэ нь бүс нутгийн хэмжээний хямрал болж АНУ-г ч түргэн авахуулж чадсан юм. Гэтэл өмнөдийн талд ирсэн тагнуулын мэдээлэл энэ бүхэн зөвхөн нэгдэлийн эхлэл байсныг баталж байна. Хэрвээ үнэн бол шүү дээ.

Үнэн ч байж болно. Солонгосын хойгийн асуудал дээр хоёр солонгосын аль нь ч сэтгэлийн хөдөлгөөнөөрөө хандах гээд байдаг сул талтай. Хойд Солонгосын тухайд бол бүр ч илүү. Тэнд ямар нэгэн мэдээллийг өөхшүүлэх чадалтай олон арван генералууд бий. Өмнөд ч ялгаагүй тиймэрхүү хүчтэй зөвлөхүүд шил даран байж байгаа. Гэхдээ тагнуулын мэдээллийн үнэн худлыг бид тогтоох хүмүүс биш. Харин энэ мэдээлэл цацагдсан нь анхаарал хандуулах хэрэг. 1980 оны үйл явдал болоод авч байгаа арга хэмжээ бодлогуудыг харвал энэ бол байж болох мэдээлэл. Солонгос хүний генийн кодексоор харсан ч энэ мэдээлэл үнэний ортой. Өмнөдүүд энэ мэдээллийг яагаад эмзэгээр хүлээж аваад байгаа юм бэ? тэд хүчээр нэгдэхээс л айдаг. Хэрвээ нэг л товчлуур дарах юм бол унтсан лууг сэрээнэ. Солонгосын дайнаас хойш Өмнөдийн нутаг дэвсгэрт байсаар ирсэн цэргийн бааз амь орж, зөвхөн бүс нутгийг бус дэлхийг хамарсан хямрал болж хувирна. Хэрвээ ямар нэгэн байдлаар нэгдэх эсэх талаар яриа гараад эхэлсэн л бол тэр нь ойрын хоёр жилдээ намжихгүй. Хэрвээ Ким Жон Ун ямар нэгэн  төлөвлөгөө боловсруулсан л бол няцана гэсэн ойлголт түүнд үйлчлэхгүй.

Магадгүй энэ ажил хэрэг болчихвол хоёр солонгос нэгдэнэ гэж ойлгох хүмүүс байгаа ч нэгдэхгүй улам л хөндийрнө гэж харах хүмүүс байгаа. Түүхийн хуудсыг сөхье л дөө. Солонгосын хойгын дайнд хамгийн их нөлөө үзүүлж, үр дүнг нь эргүүлсэн улсууд бол ЗХУ болон АНУ. Нэгдэх асуудал дээр, дооргүй яригдаад эхэлбэл энэ хоёр улс ямар нэгэн байдлаар хутгаж байж салдаг. Хэрвээ хойдчууд айлгүйгээр ямар нэгэн аргаар үүнийг ажил хэрэг болох л юм бол энэ хоёр улс оролцох нь гарцаагүй. Өмнөдүүд ийм байдлыг мэдэж байгаа учраас энхийн хэлэлцээр хийхийг эрхэмлэдэг. Тиймээс Ким Де Жуны үед хоёр, гурван ч удаа хэлэлцээрийн ширээний ард суусан ч ямар нэгэн үр дүнд хүрээгүй юм. Япон болон Өмнөд Солонгост болсон дэлхийн аваргын үеэр хоёр солонгос нэгдэж нэг тугны дор оролцох тухайгаа Ким Де Жун дэвшүүлсэн ч хойдчууд үл ойшоосон билээ. 2008 оны Бээжингийн олимпод ч тэд нэгдсэн тугны дор оролцохоор ярилцаж байсан ч бас л болоогүй. Одоо бол 2016 онд нэгдсэн тугны дор оролцох талаар яригдаж байгаа ч хойдчууд хүлээж авах нь эргэлзээтэй. Өмнөдийн бодлого нэг талаараа зөв байж болох ч хойдчууд түүхийн аль ч үед, ямар ч хэлэлцээр бултаж сурсан болохоор өмнөдийн үйл хэргийг биелэгдэшгүй даалгавар гэж тодорхойлж болох талтай.

Нэгдлийн тухай яриа хойдчуудын зүгээс салхилж эхэллээ. Зөв буруу алин болохыг үл мэдэх ч нэгэнт л яриа эхэлсэн бол гадныхан анхаарлаа хандуулна гэсэн үг. Анхаарлаа хандуулна гэдэг бас нэг л шалтгаантай. Гэхдээ одоогоор өмнөд, хойдын аль нь ч энэ мэдээллийг ил болгохыг хүсэхгүй байна.