Эрүүл мэндийн сайд жижигхэн аккаунттай зууралдаж байх зуур дахиад  нэг эмчийн буруугаас болж зургаахан сартай охин амиа алджээ. Тодруулбал, энэ хэрэг аравдугаар сарын 1-нд гарсан бөгөөд Сонгинохайрхан дүүргийн  нэгдсэн эмнэлгийн эмч М-ийн хайхрамжгүйн алдааны уршгаар зургаан сартай охин амиа алдсан байна.  Охины эцэг эхчүүд цагдаад гомдол гаргаснаар  эмчийг цалингийн 20 хувиар торгож, арга хэмжээ авчээ. Хэрвээ Эх нялхасийн  эрдэм шинжилгээний төв манай, танай харъяа гэж нааш цааш нь гүйлгээгүй бол, СХД-ийн нэгдсэн эмнэлгийн эмч жаахан хариуцлагатай хандсан бол охин амиа алдахгүй байж болох л байв. Үүнээс хэдхэн хоногийн өмнө Сүхбаатар дүүргийн нэгдсэн эмнэлэгт  гурван настай охин бас л эмч, эмнэлгийн ажилтнуудын буруугаас болж хорвоог орхисон. Шөнийн нойрондоо харам загнасан хоёр сувилагчиаас болж амиа алдсан охины төлөө тэднийг хариуцлага алдсан гэх үндэслэлээр  ажлаас нь халаад л өнгөрсөн. Тэглээ гээд насан туршдаа сэтгэлийн шархтай үлдсэн эцэг эхийн зовлонг эмчилж чадахгүй шүү дээ. “Гурван гал” эмнэлэгт төрсөн бүсгүй хэвтэрийн өвчтөн болчихсон гэх мэдээлэл фээсбүүкээр цацагдаж байна. Өч, төчнөөн өндөр төлбөр авсан шигээ ажилдаа жаахан хариуцлагатай хандсан  бол цэл залуухан бүсгүйн хувь заяа орвонгоороо эргэхгүй  байсан  болов уу.

Шинэ жилийн өмнөхөн согтуу сувилагч дөнгөж төрсөн нярайг түлсэн хэрэг гарсан. Бас л ажлаасаа халагдах төдийхнөөр асуудал шийдэгдсэн. Түүний дараахан Эх нялхас, эрдэм шинжилгээний төвд мэс засалд орсон хоёр настай хүү мөн л эмчийн хариуцлагагүйгээс болж энэ хорвоогоос буцсан. Энэ мэтчилэнгээр сүүлийн нэг жилийн дотор хичнээн хүн эмч, эмнэлгийн ажилтны буруугаас болж хорвоог орхив оо. Тэдний дийлэнх нь хаана, юу нь өвдөж байгаагаа үгээр илэрхийлж чадахгүй бага насныхан гэхээр Монголын эрүүл мэндийн салбарт  ажиллаж байгаа эмч, сувилагчид ёс зүй, хүн чанараа хаана гээчихсэн юм бэ гэж асуумаар байна. 

Үхэл, амьдралтай тэмцэж байгаа бяцхан өвчтөнөө хараад өрөвддөггүй юм аа гэхэд ядаж өөриймсөг хандаж болно доо. Монгол эрүүл мэндийн салбарт ажиллаж байгаа эмч, ажилтнууд хэзээнээсээ ийм хүйтэн, хөндий болчихсон юм бол. Яагаад өвчтөндөө хүн шиг сэтгэлээр хандаж, яагаад хүний хувиар хүндэтгэлтэй хандаж  болдоггүй юм бэ, эмч нараа. Цалин бага, ачаалал их, ажил хүнд байж болно, тэрийг чинь ойлгож байна. Гэвч энэ бүхэн хэн нэгний амийг эрсдэлд хүргэх шалтгаан биш юм. Мэдээж, хэн нэгнийг амь насыг хэргээр эрсдэлд оруулья гэж боддоггүй байх. Хамгийн гол нь эмч, эмнэлгийн ажилтнуудын хариуцлагагүй, хайхрамжгүй, хүнд суртал, харилцааны доголдлоос болоод хүний амь эрсдэж байна. Өөрөөр хэлбэл, Монголын эмч нар мэдлэггүйгээсээ биш сэтгэлгүйгээсээ болоод хүний амийг эрсдэлд оруулж байгаагаа ойлгох цаг нь болжээ.  Шулуухан хэлэхэд манай эмч нар  шиг ууртай, ааштай, омогтой эмч нар дэлхийд байдаг болов уу. Магадгүй хэтэрхий их ачааллаасаа болоод ажилдаа түртээд ууртай, бухимдалтай байх үе олон л гардаг байх. Гэхдээ тэр уур, бухимдлынх  нь золиос хэн нэгэн өвчтөн байх ёсгүй шүү дээ. Тэр тусмаа харилцааны соёл муутай эмч нарын хайрхамжгүй, хариуцлагагүй алдааны золиос хүний амь байх учиргүй. Эмчийн ёс зүйд суралцахын тулд эхлээд хүн чанартай, харилцааны соёлтой  байх ёстой болов уу. Хүний амь гэдэг тоглоом биш.   

Эрүүл мэндийн салбарт ажиллаж байгаа эмч мэргэжилтнүүдийн ёс зүй, хүн чанар нь бүр доошоо орчихсон энэ үед Эрүүл мэндийн сайдаас салбарын ажил чинь хэзээ сайжрах вэ гэж асуумаар байна.