Үндэсний бөхийн хөвгүүд залуучуудын 2013 оны улсын аварга шалгаруулах барилдаан 10-р сарын 4-6-ны өдрүүдэд Баруун-Урт хотноо зохион байгуулагдлаа. Барилдаанд 19 аймгийн 26 байгууллагын 90 гаруй залуучууд уран мэхийг уралдуулан барилдлаа.
– Аймгийн засаг даргын нэрэмжит малчдад зориулсан “Эдийн засаг-Бизнес менежментийн цагаан толгой, сургалт семинар өнөөдөр боллоо. Сургалтанд сум бүрийн төлөөлөл 100-аад малчин оролцож малчин гэдэг бол мэргэжил гэдэг үүднээс өөрсдийн аж ахуйгаа хэрхэн авч явах талаар бизнесийн ухаанд суралцлаа.
– 10-р сарын 13, 14-ний өдрүүдэд Гэр бүлийн үнэ цэнэ-Хөгжил шинэчлэл үндэсний анхдугаар чуулганыг Улаанбаатар хотноо зохион байгуулах гэж байна. Энэхүү чуулганд аймаг бүрээс 4 гэр бүл оролцож өөрсдийн амьдралын туршлагаа бусадтай хуваалцах юм.
– Аймгийн хөдөлмөрийн хэлтсээс гар урлал хатгамалын сургалтыг зохион байгуулах гэж байна. Гар урлал бэлэг дурсгалын зүйлийг уран хатгамалаар оёх 5 чадамжийг иргэдэд зааж сургах юм. Уран хатгамалын зүү ороох, загасан нуруу урианхай гаралтай шийжүүр оёдлыг сургалтанд хамрагдсан хүмүүсд мэргэжлийн багш үнэ төлбөргүй заана.
– Монголын залуучуудын холбооны Сүхбаатар аймаг дахь салбарын тэргүүлэгчид нийгмийн тустай хөдөлмөрт залуучуудыг оролцохыг уриалан өнгөрсөн Ням гарагт Дөрвөлж толгойн цэцэрлэгт хүрээлэн болоод Баруун-Урт хотыг тойрсон дурсгалт хөшөөнүүдийн ойр орчмыг цэвэрлэлээ. Эдгээр хөшөө дурсгалыг цэвэрлэж байхад ихэвчлэн архи пивоны шил хөглөрч байсан нь залуучуудыг эмзэглэхэд хүргэж байсан юм.
– 10-р сарын цаг агаарын урьдчилсан төлөв гарсан байна. Сүхбаатар аймгийн нийт нутгаар 4-6 удаагийн хур тунадас орох урьдчилсан төлөв гарчээ. Ихэнх нутгаар олон дунджийн орчим хур тунадас орно. Мөнххаан, Түмэнцогт, Сүхбаатар сумын нутгаар олон жилийн дунджаас ахуй хэмжээний хур тунадас орох юм байна.