Говь-Алтай аймгийн Дарви суманд намрын дунд сарын шинийн 17-ны дашням, балжинням давхацсан билэгт сайн өдөр "Дарви хараат" үндэсний бөхийн дэвжээ байгуулагдлаа. Нээлтийн үйл ажиллагааг нээж сумын засаг дарга П.Ганхуяг үг хэлсэн бөгөөд Улаанбаатар хотоос тус сумын харьяат улсын начин Б.Пүрэвээ шавь нарынхаа хамт очиж оролцжээ.

Өдөрлөгт зориулсан 32 бөхийн барилдаан зохион байгуулахад ихэр бөхчүүд түрүү булаалдаж  сумын начин Ц.Гомбо түрүүлж, сумын заан Ц.Гонгор үзүүрлэжээ. Шөвгийн дөрөвт сумын заан П.Сүхдорж, сумын заан н.Азжаргал нар шалгаран үлдсэн байна.  Тус дэвжээнээс олон алдар цолтой бөхчүүд төрөн гарах болтугай гэж хүсэн ерөөе.