Монголын орчин үеийн урлагийн “Хөх нар” төвийн гишүүн зураач Б.Содномдаржаа өөрийн бие даасан анхны “Мөнх гал” үзэсгэлэнгээ үзэгч олонд дэлгэхэд бэлэн болжээ. Тэрээр 2009 онд СУИС-ийн ДУДС-ийн уран зургийн анги төгссөн бөгөөд одоо Ражив Гандийн нэрэмжит Үйлдвэрлэл урлалын Политехник коллежийн багшаар ажиллаж байгаа ажээ.

Зураач Б.Содномдаржаагийн “Мөнх гал” уран зургийн үзэсгэлэн энэ сарын 18-нд “Маршал арт” галерейд нээлтээ хийх бөгөөд энэ сарын 31-нийг хүртэл гарах юм байна. Үзэсгэлэнд түүний 20 гаруй бүтээл тавигдах бөгөөд зураач энэхүү үзэсгэлэнгээрээ дамжуулан монголчуудын ертөнцийг үзэх үзэл, арга ухаан, итгэл үнэмшил, оюуны хүч чадлыг нээн харуулахыг зорьжээ.