Монгол Улсын Хүний эрхийн үндэсний комисс /ХЭҮК/-оос сар тутам хийсэн ажлаа олон нийтэд тайлагнаж байгаа билээ. Өнөөдөр болсон хэвлэлийн бага хуралд ХЭЗК-ын гишүүн Н.Ганбаяр, Бодлогын дүн шинжилгээ, хүний эрхийн боловсролын хэлтсийн дарга Г.Агар-Эрдэнэ нар оролцож мэдээлэл хийсэн юм. Тус байгууллагаас ХЭҮК-ын дарга Ж.Бямбадорж, гишүүн П.Оюунчимэг, Н.Ганбаяр нараар ахлуулсан баг өнгөрсөн есдүгээр сарын 23-26-ны өдрүүдэд Баянзүрх дүүрэгт ажиллаж “Төрийн үйлчилгээ ба Хүний эрх” өдөрлөгийг зохион байгуулжээ. Нийслэлийн хүн ам олноор төвлөрөн амьдардаг томоохон дүүргийн нэгт тооцогддог тус дүүргийн Нийгмийн халамж, үйлчилгээний хэлтэс, Өмч газрын харилцааны алба, Нийгмийн даатгалын хэлтэс, захын хорооллын есөн хороог сонгон авч ажилласан байна.

Өдөрлөгийн үеэр төрийн үйлчилгээг иргэдэд тэгш хүртээмжтэй хүргэхэд учирч буй хүндрэл бэрхшээл, хүнд суртал, чирэгдэл, мэдээллийн ил тод байдлыг тодорхойлох зорилгоор хяналт шалгалт хийх, иргэдээс өргөдөл, гомдол хүлээн авах, хууль зүйн зөвлөгөө өгөх, төрийн албан хаагчдад хүний эрхийн сургалт явуулах зэрэг олон арга хэмжээг зохион байгуулжээ. НҮБ-ын Хөгжлийн хөтөлбөрийн дэмжлэгтэйгээр Баянзүрх дүүргийн Засаг даргын Тамгын газар хамтран зохион байгуулсан тус үйл ажиллагааны үеэр Монгол Улсын Хүний эрхийн Үндэсний Комиссын Ажлын хэсэг Хонхор, Амгалан, Гачуурт, Шар хад, Хужирбулан, Улиастай, Дарь-Эх зэрэг хороонд ажиллаж, тус дүүргийн иргэдээс төрийн үйлчилгээний талаар санал асуулгыг аман болон цаасан хэлбэрээр авчээ. Шалгалтын дүнгийн хурлыг ирэх долоо хоногт хийж, олон нийтэд танилцуулах гэнэ.