Киргизстаны Ош хотод болсон хүчирхийллийн улмаас 45 хүн амь үрэгдэж, 632 хүн бэртэж гэмтсэн. Энэ тоо өсөж магадгүй гэж Киргизстаны албаны хүмүүс мэдэгдээд байна. “Нас барсан хүмүүсийн бараг хагас нь бууны суманд амь үрэгдсэн бол үлдсэн нь бороохой, төмөр саваа, чулуу зэрэг мохоо зүйлсээс авсан гэмтлийн улмаас амь үрэгджээ” гэж албаны хүмүүс тодруулаад байна. Киргизстаны орон нутгийн хэвлэл мэдээллийн хэрэгсэлд бичсэнээр өнгөрсөн пүрэв гаригийн орой тус улсын хоёр дахь том хот болох Ошд Киргиз, Узбек угсаатай залуусын хооронд нийтийг хамарсан үймээн гарсан нь хүмүүсийн амь үрэгдэх шалтгаан болжээ.

Үймээн дэгдээгчид бизнесийн байгууллагууд, засаг захиргааны байгууллагуудад түймэр тавьж, эвдэн тонож эргэн тойрныг түйвээсэн. Үймээн пүрэв гаригийн үдшээс эхлээд баасан гаригийн өглөө хүртэл үргэлжилсэн юм. Ош хотод хуулийн байгууллагынхан дэг журам тогтоосон гэж мэдэгдсэн ч тус хотын энд тэнд буун дуу сонсогдсоор байна гэж сэтгүүлчид мэдээлж байна. Ош хотод одоо онц байдал зарлан нэмэлт цэрэг, цагдаагийн хүч илгээгээд байгаа ба Киргизстаны өмнөд бүсийн зарим мужид энэ сарын 20-ныг хүртэл оройны зургаагаас өглөөний зургаан цагийн хооронд хөл хорио тогтоож байгаа талаар Киргизстаны Засгийн газар мэдээлсэн байна. Киргизстанд сүүлийн үед угсаатан хоорондын зөрчил хурцдах хандлагатай байна гэж тус улсын ерөнхийлөгчийг түр хамаарагч Роза Отунбаяева баасан гаригт мэдэгдсэн талаар “CNN” агентлаг дамжууллаа.

Т.Бадрах