Ердөө дөрөв хоногийн өмнө Уул уурхайн сайд Д.Ганхуяг улсын хэмжээнд шатахууны нөөц хангалттай байгаа гэж мэдээлж байсан ч өнөөдөр Магнай трейд, Шунхлай компанийн шатахуун түгээх цэгүүдэд А-92 автобензин литр тутамдаа 50 төгрөгөөр нэмэгдлээ гэсэн мэдээлэл хэвлэлээр гарчээ. Дээрх компаниуд чухам ямар шалтгаанаар ийн үнэ ханшаа өсгөсөн талаар бид тодрууллаа.

Магнай трейд компанийн 5300…. тоот утсанд холбогдож борлуулалтын албаныхантай холбож өгөхийг хүсэхэд ресепшн эмэгтэй “Манайх өнөө өглөөнөөс А-92 шатахууны үнийг 50 төгрөгөөр нэмсэн нь үнэн. Гэвч энэ талаар мэдээлэл өгөх боломжгүй, ямар нэгэн тайлбар хэлэхгүй” хэмээгээд утсаа таслаж орхив. Харин “Шунхлай”-н хувьд А-92  бензинийг хуучин үнээр зарж байгаа бөгөөд “Нано-92”-шатахууныг есдүгээр сарын 23-ны өдрөөс А-92-оос 50 төгрөгийн өндөр үнээр борлуулж эхэлсэн гэж байлаа.

Өнөөдөр зарим нэг шатахуун нийлүүлэгчид  тухайлбал Содмонгол, Петровисийн шатахуун түгээх цэгт А-92-ыг хязгаарлалттай олгож, зарим нь огт өгөхгүй байгаа ажээ. Энэ талаар Содмонгол ХХК-ийн маркетингийн менежер доорх тайлбарыг өглөө.

-А-92-ыг яагаад түгээхгүй байгаа юм бэ. Нөөцгүй болчихсон юм уу. Уг нь Д.Ганхуяг сайд 37 хоногийн нөөцтэй гэж байсан?

-Манай компанийн хувьд нөөцгүй болсон хэрэг биш. Гагцхүү шатахуун маань хил дээр саатсан учраас хязгаарлалттай олгож байсан. Яг одоо шатахуунаа хүлээж авахаар явж байна. Маргаашаас хэвийн олгоно.

-Хил дээр яагаад саатсан хэрэг вэ?

-Хойд хил дээр аваар гарсан гээд 7-8 хоног саатлаа. Өмнөд хил ч ялгаагүй, ачаалал, дугаарлалт их байна гэсэн хариулт өглөө.