Орчин үеийн мэргэжлийн урлагийн ууган байгууллага Улсын драмын эрдмийн театр намар цагийн нээлтээ “Эцсийн зогсоол зөвхөн чи” инээдмийн жүжгээр хийлээ. Уг жүжгийн ерөнхий найруулагчаар Н.Наранбаатар ажилласан бөгөөд Английн инээдмийн жүжгийн алдарт зохиолч Рей Куни, Ж.Чэпмэн нарын “Ор хөнжил ба ноёд хатагтай” жүжгээс сэдэвлэн бүтээсэн байна. Эл жүжгээр дамжуулан хүмүүсийн зүй бус үйлдэл гэр бүлийн нандин сайхан харилцааг яаж сүйтгэдэг болохыг илэрхийлж харуулсан. Мөн ямар ч хүний амьдралын эцсийн зогсоол нь гэр бүл байдаг гэдгийг ухааруулахыг зорьсон байна.  Жүжгийн гол дүрд СТА Л.Дэмидбаатар, МУГЖ Ж.Оюундарь дүрүүдэд АЖ С.Сарантуяа, Б.Отгонбат, Д.Баттөмөр болон театрын залуу уран бүтээлчид тоглосон юм. Ардын жүжигчин С.Сарантуяа энэхүү бүтээлээр дамжуулан жүжигчин хүний чадвар хэзээд мохдоггүй болохыг илэрхийлж чадсан юм. Тэрбээр зохиолч эмэгтэйн дүрийг тун чиг чадварлаг бүтээж байсан нь үзэгчдийн нижигнэсэн алга ташилтаас харж болохоор байлаа. Энэхүү жүжгийн талаарх үзэгчдийн сэтгэгдлийг хуваалцлаа.