Хууль зүй, дотоод хэргийн сайд Ц.Нямдорж өнөөдөр 16.00 цагт УИХ-ын дарга Д.Дэмбэрэлд гурван хуулийн төслийг өргөн барилаа. Гадаадын иргэний эрх зүйн байдлын тухай хуулийн шинэчилсэн найруулгын төсөл, Орон сууцны тухай хуульд нэмэлт, өөрчлөлт оруулах тухай хуулийн төсөл, Хот суурины ус хангамж, ариутгах татуургын ашиглалтын тухай хуулийн шинэчилсэн найруулгын төслийг өргөн барив. Хууль зүй, дотоод хэргийн сайд дээрх хуулиудыг шинэчлэн найруулах, нэмэлт өөрчлөлт оруулах болсон үндэслэлээ УИХ-ын даргад танилцуулаад, хуулиудыг Улсын Их Хурлаар хэлэлцэн баталж өгөхийг хүслээ.

Гадаадын иргэний эрх зүйн байдлын тухай хуулийн шинэчилсэн найруулгын төсөл нь анх 1993 онд батлагдан хүчин төгөлдөр үйлчилж эхэлснээс хойш зургаан удаа нэмэлт, өөрчлөлт оруулж байсан бөгөөд гадаадын иргэнтэй холбогдсон эрх зүйн орчинг боловсронгуй болгох зорилгоор зохих нэмэлт, өөрчлөлтийг цаг тухайд нь оруулж хэрэгжүүлж байсан ч хуулийн зүйл заалтын уялдаа холбоо алдагдах, нэг мөр ойлгож хэрэгжүүлэхэд хүндрэл учрах болсны улмаас шинэчилсэн найруулгын төслийг боловсруулах шаардлага гарсан байна. Одоо мөрдөж байгаа хуулиар УИХ-ын дарга хуулийн төслүүдийг хаврын чуулганы хугацаанд хэлэлцэж амжихгүй байх магадлалтайг анхааруулаад, амжвал хэлэлцэх эсэхийг л шийдэж магадгүй гээд ирэх намрын чуулганаар хэлэлцэх асуудлын дараалалд оруулахаа мэдэгдлээ.
Б.Энхмандах