Монгол Улсын Гадаад харилцааны сайд Л.Болд НҮБ-ын Ерөнхий Ассамблейн 68 дугаар чуулганы хүрээнд болж буй “Цаазийн ялыг устгахад бүс нутгийн байгууллагуудын үүрэг” сэдэвт  салбар хуралдааныг 9 дүгээр сарын 27-ны өдөр Францын Гадаад хэргийн сайдтай хамтран даргалав. НҮБ-ын Хүний эрхийн Дээд комисаар Н.Пиллай, Европын Холбооны Гадаад бодлого, аюулгүй байдлын асуудлаарх Дээд төлөөлөгч К.Аштон, “Амнести интэрнэшнэль” байгууллагын Ерөнхий нарийн бичгийн дарга Ш.Шэтти, Европын Зөвлөлийн Гадаад харилцаа эрхэлсэн захирал Э.Икас, болон Норвеги, Швед, Люксембург, Португал, Испани, Итали, Мексик,  Швейцарь , Аргентин, Бельги зэрэг 12 улсын Гадаад хэргийн сайд, НҮБ-ын дэргэд суугаа Байнгын төлөөлөгч нар оролцсон уг арга хэмжээнд сайд

Л.Болд цаазын ялыг халах чиглэлээр Монгол улсын  төр, засгаас  авч хэрэгжүүлж байгаа арга хэмжээнүүдийн талаар дэлгэрэнгүй танилцуулж, Монгол Улсын туршлагаас хуваалцлаа.

Монгол Улсын Ерөнхийлөгч  Ц.Элбэгдорж 2010 онд цаазын ялд хориг тавьснаас хойш Монгол улс ийм төрлийн ялыг эрх зүйн хэрэглээнээс халах зорилгоор тууштай ажиллаж, улмаар 2012 онд Иргэний болон улс төрийн эрхийн тухай олон улсын пактын нэмэлт II Протоколд нэгдэн орсон хийгээд өнөөдөр уг протокол Монгол Улсад хүчин төгөлдөр үйлчилж байна. Мөн гэмт хэргийн тухай хуулийн төсөлд цаазын ялын тухай заалтыг хасахаар тусгагдаад байгааг ЕХ-ны Дээд төлөөлөгч К.Аштон, Франц, Португал, Норвеги, Итали зэрэг улсын  Гадаад хэргийн сайд нар болон  “Амнести интэрнэшнэль“  зэрэг олон улсын байгууллагууд онцлон тэмдэглэж  Монгол Улсад талархал илэрхийллээ. Сайд Л.Болд “Амнести интернэшнэль” байгууллагын Ерөнхий нарийн бичгийн дарга Ш.Шеттитэй ажил хэргийн уулзалт хийж, ойрын үед хамтран хэрэгжүүлэх арга хэмжээнүүдийн талаар санал солилцож, түүнийг Монгол улсад айлчлахыг урьжээ.

Гадаад харилцааны сайд Л.Болд ЕА-н 68 дугаар чуулганд оролцож, Нью-Йоркт ажиллах үеэрээ Эдийн засаг, нийгмийн хөгжлийн асуудал эрхэлсэн НҮБ-ын Ерөнхий нарийн бичгийн даргын орлогч В.Хонг-той өнөөдөр уулзлаа.

Уулзалтын үеэр НҮБ-ын Нарийн бичгийн дарга нарын газарт мэргэжилтэн ажиллуулах AE/JPO/APO хөтөлбөрийг хэрэгжүүлэхээр тохиролцож, Монгол Улсын Засгийн газар НҮБ-тай байгуулах Санамж бичигт гарын үсэг зурлаа.

Уг хөтөлбөрийг хэрэгжүүлснээр боловсон хүчнийг бэлтгэх чиглэлээр НҮБ-тай хамтран ажиллах, НҮБ-ын нарийн бичгийн дарга нарын газарт суларч буй ажлын байрны талаар өргөн мэдээлэл авах, ажлын байрны сонгон шалгаруулалтын туршлагаас суралцах, цаашилбал НҮБ-ын нарийн бичгийн дарга нарын газарт монгол иргэдийг гэрээгээр ажиллуулах  зэрэг боломжууд нээгдэж байгаа юм.

НҮБ-аас JPO хөтөлбөрийг Австрали, Австри, Бельги, Канад, Дани, Финланд, Франц, ХБНГУ, Унгар, Итали, Япон, Израил, БНСУ, Лихтейнштейн, Люксембург, Голланд, Шинэ Зеланд, Норвеги, Польш, Саудын Араб, Өмнөд Африк, Швед, Швейцар, Турк, Англи, АНУ зэрэг 30 орчим улстай хамтран хэрэгжүүлж ирсэн бөгөөд тэдгээрийн эгнээнд ийнхүү Монгол улс нэгдлээ гэж Гадаад харилцааны яамнаас мэдээллээ.