2013 оны Европын аварга шалгаруулах тэмцээний 1/4 шигшээд өрсөлдөх сүүлийн эрхийг Польшийн багийг 2:3-ийн харьцаагаар буулган авсан Болгарын волейболчид хүртлээ.

Тэмцээнийг Дани улстай хамтран зохион байгуулж буй Польшийн шигшээ Европын аварга шалгаруулах тэмцээний 2009 оны алт, 2011 оны хүрэл медальтай бөгөөд 2013 онд IX байрыг эзэлж байна.

Энэ сарын 20-нд эхэлсэн 28 дахь удаагийн Европын аварга шалгаруулах тэмцээнийг Дани болон Польш улсууд хамтран зохион байгуулж байна. Хоёр жил тутамд болдог тэмцээнд шилдэг 16 баг оролцож байгаагаас Белги, Франц, Финланд болон Герман хэсгээ тэргүүлж, 1/4-д өрсөлдөх эрхээ авсан. Харин удаах дөрвөн эрхийн төлөө хэсэгтээ 2-3-р байр эзэлсэн багууд өрсөлдсөн бөгөөд Серб, ОХУ, Италийн багууд шалгараад байсан бол сүүлийн эрхийг Болгарын шигшээ авлаа. Польшийн Гданск хотын 6000 хүний суудалтай "Евро Арена" спортын цогцолборт өчигдөр болсон “B” хэсэгт хоёрдугаар байраар шалгарсан Польш “D” хэсгийн гуравдугаар байраар шалгарсан Болгар нарын шийдвэрлэх тоглолтод 2:3-ийн (25:22, 25:22, 20:25, 24:26, 16:18) харьцаагаар болгарчууд ялалт байгуулснаар 1/4-ийн шигшээд өрсөлдөх эрхтэй боллоо.

Европын аварга шалгаруулах тэмцээнээс 2009 онд хүрэл хүртэж, 2011 онд VI байр эзэлж байсан болгарчууд тэмцээнийг зохион байгуулж буй Польшийн багийг нутгийн дэвжээн дээр хожиж, шөвгийн дөрөвт үлдэх эрхийн төлөө “D” хэсгийг тэргүүлсэн Германы багтай дахин тоглох юм. "D" хэсэгт Герман Болгарыг 3:2-ийн харьцаагаар хожиж, улмаар хэсгээ тэргүүлсэн. Герман vs Болгарын тоглолт өнөө шөнө."Евро Арена" цогцолборт болно. 

Тэмцээний IX-XVI байрт шалгарсан багуудыг танилцуулбал:

IX -р байр Польш
X-р байр Недарланд
XI -р байр Словак
XII -р байр Дани
XIII-р байр Словени
XIV -р байр Турк
XV -р байр Беларус
XVI-р байр Чех тус тус эзэлжээ.

1/4 шигшээд Белги vs Серб, Франц vs ОХУ, Финланд vs Итали болон Герман
vs Болгар оноолт таарсан бөгөөд тоглолтууд өнөө шөнө Польшид болно. Харин медалийн төлөөх тоглолтууд ирэх бямба, ням гаригуудад Дани улсад болж, тэмцээн өндөрлөнө.

НЭМЭЛТ: (23:00)

Итали vs Финланд 3:1 (23:25,20:25,25:22,25:22)

Серб vs Белги 3:1 (25:22,22:25,30:28,25:18)

Герман
vs Болгар 1:3 (30:28,25:27,22:25,20:25)