Үдээс өмнө 09 цагт хуралдахаар товлосон ч 14, 16 цаг болж хойшилсон Эдийн засгийн байнгын хорооны хуралдаан эхэллээ. Хуралдаанаар Хөрөнгө оруулалтын тухай хуулийн төслийг хэлэлцэхээр төлөвлөж байсан ч ажлын хэсгийн санал нэгтгэгдээгүй учраас маргаашийн Байнгын хорооны хурлаар хэлэлцэхээр болж, хойшлууллаа. Хөрөнгө оруулалтын хуулийн төслийг хэлэлцэх намуудын төлөөлөл бүхий Ажлын хэсгийнхэн өнөөдөр 09-16 цаг хүртэл хуралдсан ч Байнгын хороонд орж ирсэн санал дээр мөн л зөрүүтэй байр суурьтай байгаа тул бүрэн ойлголцох нь зүйтэй гэж үзсэн байна.

Түүнчлэн тус байнгын хорооны хуралдаанаар мөн Түгээмэл тархацтай ашигт малтмалын тухай хуулийн төсөл, Ашигт малтмалын тухай хуульд өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуульд нэмэлт оруулах тухай, Улсын тэмдэгтийн хураамжийн тухай хуульд нэмэлт оруулах тухай хуулийн төслүүдийн анхны хэлэлцүүлгийг хийх байсан ч МАН-ын бүлэг уг асуудалд завсарлага авснаар асуудлыг хэлэлцэлгүй хойшлуулсан юм.

Тиймээс Эдийн засгийн байнгын хорооны гишүүд яг одоо Хөрөнгө оруулалтын сангийн тухай хуулийн төслийг хэлэлцэж байна.