2.3 сая ам.долларын шагналын сантай Pan Pacific Open тэмцээн Японы Токио хотноо үргэлжилж байна.

Энэ сарын 23-нд эхэлсэн тус тэмцээнд дэлхийн топ арван теннисчдээс Беларусын Виктория Азаренка (2), Польшийн Агнешка Радваньска (4), Италийн Сара Эррина (6), Данийн Возняцки (8), Германы Кербер (9), Сербийн Елена Янкович (10) нарын шилдэг теннисчид оролцож байгаагаас Сара Эрринагаас бусад нь шөвгийн 16-д шалгараад байна.

Тэмцээнд гуравт эрэмбэтэй тоглосон Италийн Сара Эррина ОХУ-ын Светлана Кузнецовад 4:6, 4:6-ийн харьцаагаар ялагдаж, шөвгийн 16-д шалгарч чадсангүй.

Харин Серб бүсгүйчүүдээс тэмцээний зургаад эрэмбэтэй Елена Янкович, 11-т эрэмбэлэгдсэн Анна Иванович нар 1/8-д шалгараад байна. Анна Ивановичийн дараагийн өрсөлдөгч тэмцээний тавд эрэмбэтэй Германы Анжилья Кербер юм. Гуравдугаар тойрогт оноолт таарсан тэмцээнийг тэргүүлэн тоглож буй Беларусын Виктория Азаренка, АНУ-ын Винус Уильямс нарын тоглолт энэ цагт болж байна.

Ганцаарчилсан төрлийн аварга 385 мянган ам.доллар, чансааны 900 оноо, дэд аварга 192 мянган ам.доллар, чансааны 620 оноо хүртэх ажээ. Хагас шигшээд шалгарсан теннисчид 96 мянган ам.доллар, шөвгийн наймд шалгарвал 44 мянган ам.долларын шагнал хүртэх юм байна. Харин хосын аваргууд 110 мянган ам.доллар, дэд аваргууд 59 мянган ам.доллар юм байна.

Тэмцээн ирэх ням гаригт өндөрлөнө.