Монгол туургатны олон улсын хүүхдийн наадмын ширээний теннисний тэмцээн хоёр дахь өдрөө “Оч” клубт үргэлжилж байна.

Монгол туургатны олон улсын хүүхдийн IV наадам энэ сарын 18-22-ны өдрүүдэд Улаанбаатар хотноо болж байна. Олимпийн хөтөлбөрт багтдаг спортын төрлийг хөгжүүлэх, “Нанжинь-2014” хүүхдийн олимпийн хоёрдугаар наадамд оролцох тамирчдыг сонгон шалгаруулах, олон улсын спортын хамтын ажиллагааг өргөжүүлэн хөгжүүлэх зорилготой тус наадам 2009 онд манай улсад анх удаа зохиогдож эхэлжээ. 2010 онд Хөх хотод, өнгөрсөн жил Улаан-Үдэд зохиогджээ.

Наадамд Монгол, ОХУ-ын Буриад, БНХАУ-ын ӨМӨЗО-ны нийт 350 гаруй тамирчид жүдо, бокс, чөлөөт бөх, байт харваа, шатар, хөнгөн атлетик, волейбол болон ширээний теннис гэсэн спортын найман төрөлд 80 гаруй багц медалийн төлөө өрсөлдөж буй.

Наадмын төрөл тус бүрт нэг улсаас эрэгтэй, эмэгтэй дөрвөн тамирчин оролцох бол зохион байгуулагч орны хувьд найман тамирчин хүч үзэж буй. Тус наадмын ширээний теннисний тэмцээнд Монгол, ОХУ-ын Буриад, БНХАУ-ын ӨМӨЗО-ны нийт 30 гаруй тамирчин ганцаарчилсан болон багийн төрөлд өрсөлдөж байна.

Өчигдөр багийн төрлийн тэмцээн явагдаж хагас шигшээд өрсөлдөх дөрвөн баг тодорсон байна. Хөвгүүдийн хагас шигшээ тоглолтод Монгол улсын 1-р баг 2-р багтай, Буриад
улсын баг Эрдэнэт хотын багтай таарчээ. Харин охидын хагас шигшээд Монгол улсын дөрвөн баг шалгараад байна. Багийн хагас шигшээ, шигшээ тоглолтууд маргааш болж, медальтнууд тодрох юм.

Монгол улсын охидын 1 болон 3-р багууд ӨМӨЗО-ны охидын багийг 3:0, 3:1-ийн харьцаагаар хожсон байна.

Өнөөдөр охид, хөвгүүдийн ганцаарчилсан төрлийн хэсгийн тоглолтууд болж, шөвгийн наймд өрсөлдөх тамирчид тодорлоо.

Охид, хөвгүүдийн нэг бүрчлэнгийн хэсгийн тоглолтууд болж,

Охид:

А хэсгээс: Г.Индра, Н.Энхцацралт,
Б хэсгээс: Б.Анх-Эрдэнэ, Lui Shou Shin
C хэсгээс: Б.Должинзуу, н.Азжаргал
D хэсгээс: М.Дэлгэрмаа, Lou Kiyn

Хөвгүүд:

А хэсгээс: Данзанов, н.Чулуудай
Б хэсгээс: Г.Билэгжаргал, н.Мягмарсүрэн
C хэсгээс: Du Jin Wei, н.Мөнхзориг
D хэсгээс: Ч.Эрдэнэбаяр, н.Хүслэн нар тус тус шалгарлаа.

Нэг бүрчлэнгийн хагас шигшээ, шигшээ тоглолтууд ням гаригт болж, Монгол туургатны олон улсын хүүхдийн наадмын ширээний теннисний тэмцээн өндөрлөх юм.