Америкийн Калифорниас зангуугаа өргөсөн, дэлхийг ганцаараа далайгаар тойрохоор явж байсан 16 настай охин Энэтхэгийн омголон далайд явж байхдаа өчигдөр буюу пүрэв гаригт тусламж хүссэн дохио явуулсан тухай гэр бүлийнхэн нь мэдэгдсэн юм. Өчигдөр Абби Сундерландын гэр бүлийнхэн охинтойгоо утсаар ярьснаас хойш ердөө цагийн дараа түүнээс аюулын дохио хүлээн авсан байна. Сундерланд жижигхэн далбаат завиар дэлхий тойрохоор явж байгаа бөгөөд пүрэв гаригийн үдээс хойш Мадагаскарын өмнөд эргээс 2,000 миль зайд, Австралийн баруун эргээс 2,000 миль, Антарктидийн Франц арлуудаас хойшоо 500 миль зайд явж байжээ. Францын харьяанд байдаг арлаас охины хамгийн сүүлд байсан байрлал руу загас агнуурын хөлөг хөдөлсөн хэдий ч бямба гаригаас нааш охины байгаа бүсэд хүрч амжихгүй гэж мэдэгдсэн байна. Түүнчлэн Австралиас цэргийн хөлөг онгоц хөдөлсөн хэдий ч хоёр хоногийн дараа л тэнд очих юм байна. Түүний Австрали дахь найзууд нь “Airbus”-ын тийрэлтэт онгоц хөлслөн өнөөдөр нисэх гэж байгаа бөгөөд Сундерландын завийг агаараас илрүүлж чадах эсэхээ үзэх гэж байна. Завинаас ирж байгаа цахилгаан дохионоос үзвэл Сундерландын хөлөг цагт ердөө нэг миль явж байгаа бөгөөд энэ нь хөлөг живээгүй хөвсөөр байгааг илтгэж байгаа ч ямар ч байсан далбаагаараа тууштай явахгүй байгааг харуулж байна. Нэг бол далбаа нь гэмтсэн эсвэл Сундерланд өөрөө ямар нэг байдлаар гэмтэж бэртсэн учраас аялалаа хэвийн үргэлжлүүлж чадахгүй болсон бололтой гэж Сундерландын аялалын инженер Жефф Кашер ярьж байна.Сундерландын аав нь охиныхоо аялалыг Калифорнын “Thousand Oaks” дахь гэрээсээ ажиглаж байгаа бөгөөд сэтгэл санаа нь янз бүр болж байгаа ч өөдрөг байхыг хичээж байна гэж ярьсан байна. “Аббид шаардлагатай бүхий л багаж хэрэгсэл байгаа болохоор тэр энэ ослыг давж чадна. Түүнд хуурай хувцас, аврах завь, ослын үед хэрэглэх хүнс байгаа. Хэрвээ тэр биеэ дааруулалгүй тэсээд хүлээж байж чадах л юм бол удахгүй тусламж түүнийг олж очих болно” гэж гэрийнхэн нь ярьж байна. Сундерланд энэ оны нэгдүгээр сарын 23-нд 40 футын урттай завиараа дэлхийг зогсолтгүй тойрох зорилготойгоор Калифорнийн “Marina del Rey” боомтоос хөдөлсөн. Гэсэн ч техникийн гэмтлээс болоод замдаа хоёр удаа зогссон бөгөөд сүүлд дөрөвдүгээр сард Өмнөд Африкийн Кейптаун хотод зогсож засвар хийлгүүлсэн. Сундерланд хиймэл дагуулын утсаар дамжуулан гэрийнхэнтэйгээ болон өөрийг нь дэмжигчидтэй холбогдож байсан. Мөн өөрийн вэб сайтандаа аялалынхаа тухай сүүлийн үеийн мэдээ мэдээлэл дамжуулж байсан бөгөөд хамгийн сүүлд лхагва гаригт шинэ мэдээ тавьсан байна.
“Сүүлийн хэдэн өдөр зав муутай байлаа. Салхи 40-45 зангилаа хүчтэй хуйларч байсан. Харин өнөөдрөөс цаг агаар илүү аятайхан болж байна” гэж бичсэн байна. “Сундерланд маш шийдмэг, чадварлаг далайчин. Түүнд хэрэгтэй бараг бүх зүйл байгаа. Гэхдээ сүүлийн хэдэн өдөр хүчтэй шуургатай тулалдаад их ядарч цуцсан байх” гэж инженер Томас ярьсан. Өнгөрсөн жил Сундерландын том ах Зак нь амжилттайгаар дэлхийг ганцаараа завиар тойрон аялсан бөгөөд тэгж аялсан хамгийн залуу хүн гэж тооцогдож байсан. Харин Австралийн Жессика Ватсон өнгөрсөн сард дэлхийг ганцаараа тойрох аялалаа амжилттай дуусгасан бөгөөд 17 насныхаа төрсөн өдрөөс ердөө гуравхан хоногийн өмнө эх нутагтаа буцаж ирсэн. Хэрвээ аялал нь төлөвлөгөөний дагуу үргэлжилбэл Абби Сундерланд энэ оны 10 сарын 19-нд 17 нас хүрэхээсээ хоёр сарын өмнө дэлхийг тойрох аялалаа дуусгахаар төлөвлөжээ.
Т.Бадрах
