Чингисийн талбай болон талбай орчмын байгууллагуудын үүдийг цагдаагийн алба хаагчид бүрэн хамгаалалтад аваад байна. Учир нь энэ хавьд тэсрэх төхөөрөмж байрлуулсан байж болзошгүй гэх мэдээлэл цагдаагийнханд ирсэн тул иргэдийн аюулгүй байдлыг хангах үүднээс зарим албан газрын ажилчдыг барилгаас гаргаж байна. Тухайлбал, Байгаль орчин, ногоон хөгжлийн яам болон ойр орчмын дөрвөн яам, Татварын ерөнхий газар, Тод цамхаг зэрэг байгууллагын ажилчдыг барилгаас гадагш гаргалаа. Мөн яамдын байрны гадаах авто зогсоолд байрлуулсан автомашинуудыг чөлөөлж, бүх машины доторх, багаж зэргийг шалгаж байна.

Өнөөдөр Төрийн ордны гадна “Гал
үндэстэн” холбоо, зарим төрийн бус байгууллагын төлөөлөл жагсаал
хийсэн байгаа. Энэ үеэр “Гал үндэстэн"
холбооны тэргүүн Ц.Мөнхбаяр, “Монгол Улсын Аюулгүй байдлын төлөө
зүтгэе" ТББ-ын тэргүүн Г.Болдбаатар нарын хүмүүс Төрийн ордонд долоон сумтай АКА, Макаров гар
буу, тэсрэг бөмбөгтэй нэвтрэх гэж байгаад баригдсан юм. Гэтэл энэ хэргийн дараа Цагдаагийн ерөнхий газарт
 Байгаль, орчин ногоон хөгжлийн яам, Централ таурын орчимд тэсрэх бөмбөг
байрлуулсан байж болзошгүй гэх мэдээлэл ирсэн тул яаралтай арга хэмжээ авч эхлээд байна.

Одоогоор Төрийн ордон, БОНХЯ орчимд онцгой байдал, цагдаа, тагнуулын байгууллагынхан ажиллаж байна. Цагдаагийн зүгээс яамдын ажилчдыг эргэж орох шаардлагагүй хэмээн тарааж байна.

Иргэний хөдөлгөөнийхөн Урт нэртэй хууль буюу  Гол мөрний урсац бүрэлдэх эх, усан сан бүхий газрын
хамгаалалтын бүс ойн сан бүхий газар ашигт малтмал хайх, ашиглахыг
хориглох тухай хуулийн хэрэгжилтийг хангах хуулийн журамд зарим
өөрчлөлт оруулахыг эсэргүүцэн жагсаал хийсэн юм.