Гуйгаагүй байхад өгсөн 70 мянган төгрөгний “гавьяа”-г магтах гэхээр үг ч олдохгүй.Богд боорцог тарааж байгаа юм шиг гийгүүлсэн эх орны хишиг хэмээх 70 мянган төгрөгийг аваад хэн баярласан бэ? Орчин цагт хөрвүүлбэл манай нэг уран сайхны кинон дээр Богд боорцог тараахад алалдан зодоон нүдээн болдог шиг дараалал, дугаар болсон нь үнэн. Гэхдээ төрийн минь хишиг гэж залбирч буй эмгэд, настнуудыг эс тооцвол бааранд орж наргисан, Нарантуул захаас эрээвэр хураавар хувцас хунархнаа базаасан, бүр гайгүй шиг айлынхаар бол хүүхэдтэй гар утас авч өгсөн тэргүүтнийг өнөөдөр инфляцид идүүлж байгаа харамслын дэргэд баяр бахдал гэж хэлэхэд хэцүү байгаагаас ийн асуув. Түүнээс биш 70-хан мянган төгрөг гэж чамлаж байгаа юм биш шүү. 70 мянган төгрөгөөрөө ганц удаа кг нь 3000 төгрөгийн мах авч жинхэнэ махтай хоол идээд баярлаж байсан айлууд бий. Гэвч харамсалтай нь тэр мах одоо 7200 төгрөг болсон билээ. Авдаг цалин нь аманд ч үгүй хамарт ч үгүй болж, угийн нимгэн түрүүвч маань үтэр түргэн хоосорч байгаад л “түрийвч” баярлахгүй бол…
Ялихгүй зусар баяжихад саад гэдэг. Гэтэл энэ ялихгүй зусрын 70 мянган төгрөг өнөөдөр ямар их гай тарина вэ? Хүмүүсийн түрүүвчийг хумс хумсаар хоослоод зогсохгүй, ганхаж ядаж байгаа эдийн засгийг маань хуйгаар нь хөдөлгөх нь. Яг ийм байдлаар байх ахул оны эцэст инфляци 20 хувиас хэтэрнэ гэж байгаа. Өчигдөрхөн Үндэсний статистикийн хорооноос инфляци хөдөө 13,1 Улаанбаатарт 16,1 хувь хүрлээ гэж мэдээлсэн байна лээ. Энэ нь ч бас нэлээд “дарсан” тоо байх. Үнэндээ бол үнийн өсөлт үүнээс ч хэтэрч түрүүвч “ёолж” байна шүү дээ. Наад захын гэрийн эзэгтэй хүнсний дэлгүүрт орж түрийвчээ гөвсөн ч хөргөгчөө дүүргэж хүчрэхгүй байгаагаа лавтайяа хэлнэ. Алгандаа атгасан хэдэн төгрөг маань яах ийхийн зуургүй алга болж, хаанаа ч хүрэхгүй байгаагаар бид өөрсдөө бэлээхнээ инфляцийг хэмжиж чадаж байгаа уг нь, статистикчдын хоосон үгнээс илүүтэйгээр. Гуйгаагүй байхад өгсөн 70 мянган төгрөгний “гавьяа”-г магтах гэхээр үг ч олдохгүй юм. Бэлэн мөнгөний амлалтын сураг дуулдахаас л хэвлэл мэдээллийнхэн эсэргүүцэж бичиж байсан, төвбанкнаас нь инфляциа барьж хүчрэхгүй болохыг анхааруулж байсан. Эцэст нь Сангийн сайд нь “Инфляци өснө, дараа нь битгий улстөржсөн олон юм яриад байгаарай” гэж шүдээ зууж үзэв. Гэвч уг нь тэр ч өөрөө эдийн засагч, олонх гишүүд 70 мянгын хорыг хүнээр хэлүүлэлтгүй мэдэж л байсан. Харамсалтай нь, популист амлалтдаа дөрлүүлэн мугуйдлаж байна. Эдийн засаг сайн мэдэхгүй ч гэсэн эрх биш тэд ч гэсэн хор холбогдлыг нь өнөөдөр ойлгоод хөнжлөө дотроо гэмшиж байгаа байлгүй дээ, гаднаа популист багтай ч. Тэнэг л биш бол тэд ойлгох л болсон уг нь. Гэхдээ л үг барагдахын эцэст энэ УИХ, гүйцэтгэх засаглал хэзээ эдийн засгаа эдийн засгийн нүдээр харах юм бол оо гэж асуумаар байна. Өмнө нь бид бага дарга, сэтгүүлч, орчуулагч Ерөнхий сайдтай байсан. Эрх биш эдийн засагч хүн юм байна, өнөөгийн Ерөнхий сайд та энэ бүхнийг нэг эдийн засгийн нүдээр харна, эдийн засгийн алуурчны нүдээр биш шүү дээ. Эсвэл өглөгч өгөөмрийн дүртэй итгээд, амьдралаас бүр тасарчихсан байдаг юм болов уу, Ерөнхий сайд маань.
А.ТУЯА
