Монголын уран бүтээлчид Болгар улсад зохион байгуулагдсан дэлхийн язгуур урлагийн тэмцээнд амжилттай оролцож, тэргүүн байрын шагнал хүртсэн талаар Төрийн соёрхолт Д.Сосорбарам болон бусад уран бүтээлчид өнөөдөр мэдээлэл хийлээ. Наадамд 24 орны 98 хамтлаг оролцож, 10 хоногийн турш өөр өөрсдийн орны онцлогийг харуулсан бүтээлээр өрсөлджээ. Төрийн соёрхолт Ч.Сосорбарам уг наадамд оролцсон Монголын уран бүтээлчдийн найруулагчаар ажилласан байна.

Тэрээр хэлэхдээ, “Би мэргэжлийн найруулагч биш.  Номыг нь үзэж ногоотой шөлийг нь идээгүй боловч надад мэдрэмж, бидэнд өөртөө итгэх итгэл байсан” гэлээ. Уг наадамд Б.Бат-Орших ахлагчтай “Домог” хамтлаг болон “Улаанбаатар” чуулгын уртын дуучин, бүжигчин, уран нугаараачдаас бүрдсэн  нийт 17 хүний бүрэлдхүүнтэй баг оролцжээ.  Монголын  уран бүтээлчид 10 хоногийн хугацаанд  зургаан тоглолт тавьсан бөгөөд бүгд өөр өөрийн гэсэн онцлогтой үзүүлбэрүүд байсан гэдгийг Д.Сосорбарам найруулагч онцолсон юм. 

Тэмцээний явцад “Монголын багийн дараагийн үзүүлбэр юу байх бол гэсэн хүлээлт үзэгчдийн дунд үүссэн байсан нь бидний язгуур урлаг хичнээн сайхан содон, сор болсон  урлаг гэдгийг харуулж байгаа хамгийн тод жишээ” гэдгийг уран бүтээлчид хэлж байлаа.