АНУ-ын Нью-Йорк хотноо “Америкийн нээлттэй тэмцээн” тэмцээнд оролцож буй талбайн теннисний нэрт тамирчин Испаний Рафаэль Надаль олимпийн их наадмыг зохион байгуулах сунгаанд Мадрид хот бэлэн гэдгийг мэдэгдэж, дэмжихийг уриаллаа.

Аргентинийн нийслэл Буэнос-Айрес хотод Олон улсын олимпийн ээлжит чуулган есдүгээр сарын 7-10-ны өдрүүдэд болж байна. Энэхүү чуулганаар хэд хэдэн асуудлыг хэлэлцэх бөгөөд өнөөдөр долоон жилийн дараа болох олимпийн хотын нийслэлийг тодруулах юм.

2020 оны олимпийн нийслэлд нэр дэвшсэн хотуудаас Испанийн Мадрид, Туркийн Истанбул, Японы Токио хот тунаж үлдээд байгаа. Тиймээс өнөө шөнө 2020 оны зуны болон паралимпийн их наадмыг зохион байгуулах хотын нэр тодрох юм. Тиймээс энэ өдрүүдэд “Америкийн нээлттэй тэмцээн”-нд оролцож буй Испанийн нэрт теннисчин Рафаэль Надаль “Мадрид 2020” дэмжиж байгаа илэрхийллээ. Тэрбээр “Бээжин-2008” олимпийн их наадмын эрэгтэйчүүдийн ганцаарчилсан төрлөөс алтан медаль хүртэж байсан.

Олон улсын олимпийн хорооны 125 дугаар чуулганы хуваарь ёсоор өнөөдөр олимпийн нийслэлийг, маргааш спортын төрлийг, харин энэ сарын 10-ны өдөр ОУОХ-ын шинэ тэргүүнийг сонгох юм.

"Америкийн нээлттэй тэмцээн"-нд хоёрт эрэмбэлэгдэн тоглож буй Испаний Рафаэль Надаль тус тэмцээний хагас шигшээд тэмцээний наймд эрэмбэтэй Францын Ришар Гаскетай тоглох юм. Хагас шигшээ тоглолт өнөө шөнө болох бөгөөд Надаль ялалт байгуулвал Швейцарийн Станислас Вавринка (9) vs Cербийн Новак Жокович (1) нарын хэн хожсонтой нь аваргын төлөө тоглох юм.

Надаль "Их дуулга"-ын 12 түрүү хүртсэнээс 2010 онд "US OPEN"-нд түрүүлж, 2011 онд дэд аваргаар шалгарч байжээ.