Өмнөд Америкийн хойд хэсэгт орших Суринам улсын Ерөнхийлөгчийн хүү АНУ руу хар тамхи зөөвөрлөсөн хэргээр Панам улсаас баривчлагджээ. Панамын албаныхан Суринам улсын Ерөнхийлөгчийн хүү 40 настай Дино Баутерсег өчигдөр Токумен олон улсын нисэх онгоцны буудлаас баривчлан, АНУ-ын Нью-Йорк хотын өмнөд дүүргийн шүүхэд шилжүүлсэн аж. Дино Баутерсе нь өнгөрсөн 2011 оны арванхоёрдугаар сараас 2013 оны наймдугаар сарыг хүртэл АНУ руу таван кг гаруй кокайн нууцаар хил нэвтрүүлсэн хэрэгт сэжиглэгдэж байгаа гэнэ. Түүнчлэн түүнийг хар тамхитай холбоотой гэмт хэргээс гадна галт зэвсэг, тэсрэх бөмбөг, пуужин эсэргүүцэгч, гар буу зэргийг АНУ руу зөөвөрлөсөн хэрэгт буруутгаж байгаа аж. 

АНУ-ын хуулийн дагуу дээрх хоёр хэрэгт бүх насаар нь шоронд хорих хүртэлх хэмжээний ял, шийтгэл оногдуулдаг байна.

Суринамын Ерөнхийлөгч Деси Баутерсе ч мөн нэр цэвэр хүн биш бөгөөд тэрээр 1982 оны арванхоёрдугаар сард улстөрийн сөрөг хүчний 15 хүний амийг хөнөөсөн хэргээр хүн төрөлхтний эсрэг гэмт хэрэгт буруутгагддаг байна. Тэрээр 1980-1987 оны хооронд Суринам улсыг цэргийн дэглэмээр захирч байсан ба хожим 2010 онд тус улсын Ерөнхийлөгчөөр ажиллах болсон аж.

Түүнчлэн Дино Баутерсегийн төрсөн дүү нь 2005 онд Суринамын шүүхээс хар тамхи, хууль бус галт зэвсэг зөөвөрлөсөн хэргээр найман жил шоронд хорих ял сонссон байжээ. Гэвч түүний эцэг Суринамын Ерөнхийлөгч болсныхоо дараа бага хүүгээ терроризмтой тэмцэх газрын дээд албан тушаалд томилон ажиллуулж байгаа гэнэ.