Улсын драмын эрдмийн театрын хамт олон өнөөдөр мэдээлэл хийж, бяцхан үзэгчдэдээ зориулан “Норовын намтар” жүжгийг толилуулахад  бэлэн болсон байна.

Театрын уран бүтээлчид хэвлэлийн хуралд жүжгийн хувцастайгаа оролцож, танилцуулсан юм. Мөн “Норовын намтар” жүжгийн дууг дүрсжүүлж клип хийлгэснээ өнөөдөр болсон хурлын үеэр албан ёсоор танилцуулав.

“Норовын намтар” хошин мюзикл жүжгийн зохиолыг Д.Нацагдоржийн нэрэмжит шагналт, хүүхдийн зохиолч Д.Содномдоржийн 1957 онд зохиосон “Норовын намтар” бэсрэг найраглалаас сэдэвлэн, шинэчлэн бичжээ. Уг жүжгийг ирэх есдүгээр сарын 4-8-ны өдрүүдэд 14.00 болон 15.40 цагаас /нийт 8 удаа/ тус тус тоглох ба монголд анх удаа тоглож буй үндэсний хэмжээний хүүхдийн сургамжит жүжиг гэдгээрээ онцлог юм.