Улаанбаатар хотод хоёр өдөр үргэлжлэн бороо орсон нь төвөөсөө эхлээд гэр хороолол нэлэнхүйдээ усанд автахад хүргэж, Нийслэлийн Хот тохижилтын газрынхныг нэгэн шинэ ажилтай зууралдахаас аргагүй болгов. Тус газрынхны мэдээллээр бол Зам цэвэрлэгээний албаны найман машин өнөөдөр өглөөнөөс эхлэн Энхтайваны өргөн чөлөө, Олимпийн гудамж, Бага тойруу, Их тойруу зэрэг замуудын борооны тогтоол усыг соруулж байгаа аж. Үүгээр бол бороо орох бүрийд Зам цэвэрлэгээний албаныхан авто зам дагуух тогтоол усыг соруулах болж байна. Энэ ажлыг гүйцэтгэхдээ тэд хотын төвийнхнийг бодоод гэр хорооллынхныг гаргуунд нь хаях бололтой. Нэг ёсны дарга нарын нүд хүрэх газрын усыг соруулаад, хялайж ч харахгүй хэсгийг шууд хаяна гэсэн үг л дээ.

Уг нь бол сайн ч муу ч амьдралтай байлаа гэсэн Монгол Улсын иргэн л бол төрийн үйлчилгээг жигд хүртэх ёстой. Гэр хороололд үүсээд байгаа шавар шалбааг, намаг балчиг, тогтоол усыг хотын төв шиг соруулж өгч болохгүй юу дарга нар аа?