Дэлхийн оюуны спортын наадмын үндсэн төрөл 100 буудалт даамын эмэгтэйчүүдийн дэлхийн аварга шалгаруулах тэмцээн Монгол Улсын нийслэл Улаанбаатар хотноо ирэх аравдугаар сарын 1-15-ны өдрүүдэд зохион байгуулагдах гэж байна. 38 дахь удаагийн Дэлхийн аварга шалгаруулах тэмцээнд дэлхийн шилдэг 16 даамчин “Дэлхийн аварга” цолны төлөө өрсөлдөх юм. Тус тэмцээн “Пума Империал” зочид буудлын хурлын танхимд болох бөгөөд өнөөдөр хамтран ажиллах гэрээнд гарын үсэг зурлаа. 100 буудалт даамын эмэгтэйчүүдийн дэлхийн аварга шалгаруулах тэмцээнийг зохион байгуулахад  Соёл, спорт аялал жуулчлалын яамнаас дэмжин ажиллаж, улсын нөөц сангаас 50 сая төгрөгийн хөрөнгийг гаргахаар болжээ.

Тэмцээнд ОХУ, БНХАУ, Украйн, Голланд, Монгол зэрэг арван орны шилдэг 16 тамирчин өрсөлдөх юм. Тэдний дунд одоогоор “дэлхийн аварга” цолыг эзэмшигч, дэлхийн таван удаагийн аварга, ОХУ-ын их мастер Тамара Тансыккужина, дэлхийн 12 удаагийн аварга, Латви улсын тамирчин, олон улсын их мастер Зоя Голубева, дэлхийн дөрвөн удаагийн аварга Украйны их мастер Дарья Ткаченко болон Ази тивийн аваргын мөнгөн медальт, 2012 оны дэлхийн залуучуудын аварга, БНХАУ-ын аварга, олон улсын мастер Ханчин Жао нарын шилдгүүд багтаж байна. Монгол улсаас гурван тамирчин оролцохоос 2012 оны Ази тивийн аварга, олон улсын их мастер М.Нямжаргал, 2013 оны Ази тивийн аварга, олон улсын их мастер Э.Мандахнаран болон Азийн аварга шалгаруулах өсвөр үеийн тэмцээний мөнгөн медальт, спортын дэд мастер М.Одгэрэл нарын тамирчид эх орноо төлөөлөн оролцоно.

Тэмцээний хуваарь ёсоор аравдугаар сарын 2, 3-ны өдрүүдэд блиц болон түргэн тоглолтын Дэлхийн аварга шалгаруулах тэмцээнийг зохион байгуулах юм.

Монголын даамын холбоо эх орныхоо оюуны ирээдүйд өөсрдийн хувь нэмрийг оруулах, хүүхэд залуучууд оюуны спортыг сонирхон хичээллэх мөн тив, дэлхийд амжилт гаргах тамирчид бэлтгэн гаргах чиглэлд сүүлийн жилүүдэд эрчимтэй ажилласны үр дүнд энэхүү спортыг сонирхон хичээллэгсдийн тоо 25 мянгад хүрээд байна. Хоёр жил тутамд нэг удаа болдог дэлхийн аварга шалгаруулах тэмцээнийг эх орондоо зохион байгуулахтай холбогдуулан www.ulaanbaatar2013.com вэбсайтыг ажиллуулж эхлээд байна.