Энэ оны хоёрдугаар хагаст нийтдээ 200 мянган тонн алт, зэсийн баяжмал экспортолно гэж төлөвлөж байсан “Оюутолгой” компанийн ажил хөрөнгө оруулалтын маргаанаас үүдэлтэйгээр түр зогсоод буй. “Эрдэнэт” уул баяжуулах үйлдвэрийн бүтэн жилийн экспортыг хагас жилд гаргах хүчин чадалтай Оюутолгойн далд уурхайн бүтээн байгуулалт ийнхүү зогссон, хөрөнгө оруулагчидтай үл ойлголцсон асуудлын хариуцлагыг хэнтэй тооцох вэ?

Үүнд өмнөх болон одоогийн Засгийн газрыг буруутгаж байгаа нь зүй ёсны хэрэг юм. Гэхдээ Засгийн газар шат, шатны хариуцлагын асуудлыг сөхөж, энэ удаад “Оюутолгой” компанийн ТУЗ-д Монголын эрх ашгийг төлөөлөн ажилладаг гурван гишүүн үүргээ хэр биелүүлсэн бэ гэдгийг шүүх учиртай гэж хөндлөнгийн шинжээчид үзэж буй. Монголын Засгийн газар, ард түмний өмнө үүрэг хүлээсэн ТУЗ-ийн гишүүнээр Н.Багабанди, П.Цагаан, Ч.Ганболд нар ажилладаг. Тэгвэл тэдний хариуцлагын асуудлыг Засгийн газар ойрын үед хэлэлцэхээр төлөвлөж байгаа төдийгүй осол, зөрчил давтагдах болсон үндэслэлээр “Улаанбаатар төмөр зам” нийгэмлэгийн даргын асуудлыг ч бас хэлэлцэх гэнэ. Өөрөөр хэлбэл, Засгийн газрын зүгээс “Оюутолгой”-н ТУЗ-ийн гишүүд, төмөр замын даргын томилгоог дахин хийхээр болсон гэх мэдээлэл байна.