Авъяаслаг алдартай жүжигчдээс бүтсэн “Зэрлэг цэцэгсийн хүлэмж” киноны клип болон трейлертэй холбогдуулан тус киноны уран бүтээлчид албан ёсоор сэтгүүлчдэд мэдээлэл хийлээ. Хэвлэлийн хуралд “UBS music” телевизийн захирал, хөтлөгч П.Одгэрэл,  “Хувьсал продакшин”-ы жүжигчин У.Уранчимэг, Д.Ганцэцэг, А.Ганчимэг  болон ҮДБЭЧ-ын бүжигчин М.Бямбаа нар хүрэлцэн ирлээ.

“Зэрлэг цэцэгсийн хүлэмж” кино 1981 оны үед болсон түүхэн явдлыг жүжигчин Д.Ганцэцэг кино зохиол болгон бичиж, гавьяат жүжигчин У.Уранчимэг тус киноны найруулагчаар ажилласан байна. Киноны дууны үгийг “UBS music” телевизийн захирал, хөтлөгч П.Одгэрэл зохиож, аяыг нь урлагийн гавьяат зүтгэлтэн Л.Балхжав зохиосон аж. Мэдээж дуучдын сонголтын хувьд маш чадварлаг эмэгтэй дуучдыг сонгожээ. Дуучин Б.Маралжингоо болон Э.Агиймаа мөн хамгийн сонирхолтой нь гавьяат жүжигчин У.Уранчимэгийн дүү У.Уранцэцэг нар дуулсан байна.

“Зэрлэг цэцэгсийн хүлэмж” киноны гол дүрүүдийн тавыг  нь эмэгтэй жүжигчид бүтээжээ. Трейлер болон клипийг нь харахад маш чадвар шаардсан магадгүй тэр болгон уран бүтээлчдийн хөндөөд байдаггүй сэдвийг хөндсөн бололтой. “Хувьсал” продакшин “Зэрлэг цэцэгсийн хүлэмж”-ээр дэлгэцийн уран бүтээлийн гараагаа тавьж байгаа бөгөөд цаашдаа тайзны болон дэлгэцийн олон уран бүтээл хийхээр төлөвлөж байгаа гэдгээ ч У.Уранчимэг жүжигчин нуулгүй хэлээд амжлаа.

Кино сонирхогчдын дунд хамгийн их хүлээлттэй кино болоод байгаа “Зэрлэг цэцэгсийн хүлэмж” киноны нээлт ирэх есдүгээр сарын 12, 13-ны өдрүүдэд хоёр өдөр хийхээр төлөвлөөд байгаа аж.