“Лужник” цэнгэлдэх хүрээлэнд болж буй хөнгөн атлетикийн ДАШТ-ний долоо дахь өдөр буюу өчигдөр эрэгтэйчүүдийн 4х400 метрийн буухиа гүйлт болж, ОХУ-ын баг хүрэл медаль хүртлээ. Энэ төрөлд АНУ-ын баг 2:58.71 минутын амжилтаар алтан медаль хүртэж, Ямайкын баг 2:59.88 минутын амжилтаар мөнгөн медаль, ОХУ-ын баг 2:59:90 минутын амжилтаар хүрэл медаль хүртлээ. ОХУ-ын буухиа гүйлтийн эрэгтэй баг ДАШТ-ний анхны медиалаа хүртэж байна. Тухайлбал, 1983 оны ДАШТ-нд энэ зайнд ЗХУ-ын бүрэлдэхүүн улс байхдаа алтан медаль авч байсан бөгөөд ийнхүү 30 жилийн дараа хүрэл медаль хүртэж байна.Харин өнөө шөнө эмэгтэйчүүдийн 4х400 метрийн уралдаан болох бөгөөд "Берлин-2009", "Тэгү-2011" ДАШТ-ээс хүрэл, Лондонгийн наадмаас мөнгөн медаль хүртсэн ОХУ-ын эмэгтэй баг дөрөвдүгээр замаар уралдахаар шигшээд шалгараад байна.
Мөн энэ өдөр явагдсан эмэгтэйчүүдийн дүүгүүр шидэлт, эрэгтэйчүүдийн уртын харайлтын төрөлд ОХУ-ын тамирчид алтан медаль хүртлээ. Нутагтаа болж буй ДАШТ-нээс 5-6 алтан медаль авна гэж тэмцээний өмнө мэдэгдэж байсан ОХУ баг эхний зорилгодоо хүрээд байна. Нийт 47 багц медалиас 34 нь эзэндээ очоод байгаагаас АНУ таван алт, есөн мөнгө, хоёр хүрэл медаль хүртсэн амжилтаар тэргүүлж байгаа бол ОХУ (5+3+3), Кени (3+3+3) улсууд удаалж байна. 206 орноос 35 улс ямар нэгэн медаль хүртсэнээс БНХАУ нэг мөнгө, гурван хүрэл медаль хүртэж XIX, Катар улс нэг мөнгө (эрэгтэйчүүдийн өндрийн харайлт), Япон улс нэг хүрэл (эмэгтэй марафон) XXII, XXIX байрт бичигдэж байна.
Эрэгтэйчүүдийн марафон гүйлтийн тэмцээн өнөөдөр болох бөгөөд 70 тамирчин уралдаанд оролцоно. Улаанбаатарын цагаар 20:30 цагаас гараанаас гарах уг уралдаанд Монгол Улсын гавьяат тамирчин, ОУХМ Б.Сэр-Од оролцох юм. 6 дахь удаагаа дэлхийн аварга шалгаруулах тэмцээнд оролцож буй Б.Сэр-Одын хувьд энэ жил Хонгконгт болсон Азийн марафоны аварга шалгаруулах тэмцээнээс 2:17:56 цагийн амжилтаар алтан медаль хүртсэн. “Тэгү-2011” ДАШТ-нд 20-р байр эзэлсэн түүний хувьд олимпийн гурван наадамд эх орноо төлөөлөн оролцсон.
