“Sansar HD” “SPS” суваг  Английн “Премьер лиг”-ийн 2013-16 оны улирлын тоглолтуудыг Монгол орон даяар цацах Албан ёсны онцгой эрхийг “SansarHD” эзэмшинэ. Үзэгчдийн эрх ашгийг хүндэлж үзээд есдүгээр сарын 15-ны өдөр хүртэл “С1” тв-ээр Английн ПЛ-ийн тоглолтуудыг үзүүлэхээр болсон. Мөн Ddish, SansarHD-ийн хэрэглэгчид эхний нэг сарын хугацаанд Английн “Премьер лиг”-ийг үнэ төлбөргүй үзнэ.

Ddish-ийн хэрэглэгчид 31, 34, 36, 60-р сувгуудаар SPS-ийн нэгээс дөрвөн сувгийг 8-р сарын 17-ноос хүлээн авч үзэх бол SansarHD-ийн хэрэглэгчид наймдугаар сарын 17-ны өдөр 814 давтамж дээр SPS-ийн нэгээс дөрвөн сувгийг хүлээн авч үзнэ.

Европын хөлбөмбөмбөгийн лигүүд дундаас үзэгчдийн тоо, нэр хүндээрээ нэгдүгээрт орох Английн “Премьер лиг”-ийг Монголд анх удаа дуу дүрсний өндөр чанартайгаар “SPS” суваг гаргана. Тус суваг нь Английн дээд лигийн тоглолтуудаас гадна Европын Хөлбөмбөгийн Холбооны хамгийн нэр хүндтэй тэмцээн болон “Аваргуудын лиг”-ийн Монголд шууд дамжуулах албан ёсны онцгой эрхийг авсан болно.

Жил ирэх тусам үзэгчдийн тоогоо нэмж, Европ төдийгүй дэлхийг байлдан дагуулж байгаа “Премьер лиг” нь Английн Хөлбөмбөгийн холбооны тэргүүн лиг бөгөөд 1993 оноос нэрээ өөрчилж дүрмэндээ шинэчлэлт оруулснаар өнөөгийн бидний мэдэх дэлхийн шилдэг лиг болтлоо өргөжин дэвшээд байна. 1993 оноос хойш тасралтгүй өссөөр өмнө нь дэлхийд ноёлж байсан Испани, Итали, Германы лигүүдээс илүү чансаатай болжээ.

Монголын телевизүүд “Премьер лиг”-ийг дөрвөн жилийн өмнөөс гаргаж эхэлсэн бөгөөд шууд дамжуулах эрхийг эзэмшиж байснаас энэ удаагийнх шиг албан ёсны онцгой эрхийн хүрээнд дуу дүрсний өндөр чанартайгаар дамжуулж байгаагүй. “Премьер лиг”-ийн 2013-14 оны улирлын тоглолтууд наймдугаар сарын 17-нд эхлэх бөгөөд ирэх жилийн тавдугаар сард дуусна. 10 сарын туршид 38 тойргийн нийт 380 тоглолтыг шууд дамжуулан үзүүлэх гэх мэт өмнө нь Монголын үзэгчдэд хүрч байгаагүй олон давуу талуудаар “SPS” суваг бэлэг барих гэж байна. Европ, Английн Хөлбөмбөгийн Холбооны томоохон тэмцээнүүдээс гадна хөлбөмбөгийн багуудын тусгай телевиз, тамирчдын танилцуулга, түүх, баримтат кино зэрэг хөтөлбөрүүд бидний төлөвлөсөн “Хөлбөмбөгийн багц”-д орж байгаа.

“Премьер лиг” болон “Аваргуудын лиг”-ийн тоглолтуудыг орон даяар цацах “SPS” суваг нь спортын төрөлжсөн суваг байх зөвхөн “Sansar HD”, ”DDish”-ийн нийт 300 гаруй мянган өрхийн хэрэглэгчдэд хүрнэ. Мөн “SPS” суваг нь дээрх дэлхийн шилдэг хөлбөмбөгийн тэмцээнүүдээс гадна теннис, хоккей, усанд сэлэлт, сагс, гольф, авто ралли, хөнгөн атлетик зэрэг дэлхийн тэргүүн зэрэглэлийн спортын төрлүүдийн том тэмцээнүүдийг албан ёсны онцгой эрхтэйгээр Монголын үзэгчиддээ хүргэнэ.

Дэлгэрэнгүй зааварчилгааг sansar.mn сайтаар авч болно.