Канадын Торонто хотноо 2 сая 369 мянган ам.долларын шагналын сантай “Rogers Cup” тэмцээний ганцаарчилсан болон хосын төрлийн хагас шигшээд өрсөлдөх теннисчид тодроод байна.

Тэмцээнийг
тэргүүлэн тоглож буй АНУ-ын Серена Уильясм, Польшийн Агнешка
Радваньскатай, тэмцээний дөрөвт эрэмбэтэй Хятадын Ли На Румын Сорана
Кырстятай оноолт таарчээ. WTA-ийн чансааны 27-д бичигдэж буй Румыны
Сорана Кырстя хагас шигшээ хүртлээ Данийн Каролина Возняцки /9/, Сербийн
Елена Янкович/15/, улмаар зургаад эрэмбэлэгдсэн Чехийн Петро Квитова
нарын шилдгүүдийг буулган авснаар Хятадын Ли На-гийн эсрэг гарч ирлээ.

Тус тэмцээний ганцаарчилсан төрлийн хагас шигшээд шалгарахад 140 мянган ам.доллар хүртэж, чансааны 395 оноо авч байгаа аж.

Хосын
төрлийг тэргүүлэн тоглосон Италийн Италийн Сара Эррина, Роберт Винчи
нар хагас шигшээд шалгараагүй байна. Харин хоёрт эрэмбэтэй ОХУ-ын
Екатарина Макаров, Елена Виснина нарын хослол хагас шигшээд гуравт
эрэмбэтэй Чех, Германы хослолтой таарчээ. Хосын төрлийн аваргууд 122
мянган ам.доллар хүртэж, чансааны 900 оноо авах бол дэд аваргууд 61
мянган ногоон халаасалж, 620 оноо хүртэх ажээ.

Харин эрчүүд Монреаль хотноо өрсөлдөж байгаагаас хагас шигшээд Сербийн Новак Жокович, Испаний Рафаэль Надаль нарын шилдгүүд шалгарч, шигшээд шалгарах эрхийн төлөө өрсөлдөнө. Нөгөө хэсгээс Канадын хоёр теннисчин буюу Васек Посписил /11/, Милош Раонич нар шалгарчээ.

Тэмцээний аваргууд ням гаригийн орой тодорно.