Улсын драмын эрдмийн театрын жүжигчин У.Уранчимэг, Д.Ганцэцэг, А.Ганчимэг нар сэтгэл оюунаа нэгтгэн “GUG” продакшныг байгуулсан бөгөөд өөрсдийн нэрийн эхний үсгээр ийнхүү продакшнаа нэрлэжээ.

“GUG” продакшны анхны бүтээл “Зэрлэг цэцэгсийн хүлэмж” уран сайхны кино тун удахгүй кино театруудын дэлгэцнээ гарах гэж байна. Энэхүү киногоороо нийгмийн харилцаа өөрчлөгдөж, зах зээлийн эдийн засгийн шилжих явцад хүмүүс бие биенээ хүндэтгэх, хайрлах, хүн ёсны зан үйлээс алгуур холдож байгаа бөгөөд бие биенээ аялдан дагалдах, гадаад үзэмж хөөн амьдрах өнөө үед хүний дотоод сэтгэл, хүн чанар, сэтгэлийн их тэнхээ, хүн хүнээ дээдлэх ариун нандин ёс хичнээн чухал болохыг өөрсдийн эзэмшсэн мэргэжил, авьяас чадвараа дайчлан харуулахыг зорьсон аж. Энэ киноны зохиолыг жүжигчин Д.Ганцэцэг бичсэн бөгөөд У.Уранчимэгт зориулан бүтэн жил гаруй хугацаа зарцуулжээ. Киноны гол дүрд У.Уранчимэг, Д.Ганцэцэг, А.Ганчимэг, ҮДБЭЧ-ын бүжигчин М.Бямбаа, жүжигчин Энхтүвшин, мэргэжлийн 90 гаруй жүжигчид оролцон тоглосон аж.

У.Уранчимэгийн хувьд түүний тоглосон олон сайхан тайзны жүжгийн дүрүүд цөм өөр өөрийн онцлог дүр төрхтэй байдгийг үзэгчид маань андахгүй мэддэг. Тэгвэл тэрээр энэхүү кинонд  урьд өмнө нь харж байгаагүй өвөрмөц дүр төрхийг бүтээсэн билээ. Энэхүү киноны эрэгтэй гол дүрд БНСУ-д Кино урлагийн дээд сургуулийг жүжигчний мэргэжлээр төгссөн, тус улсын олон ангит кинонд гэрээгээр тоглодог чадварлаг жүжигчин Энхтүвшин тоглосон юм. Монголын кино урлагт ижилгүй сайхан эрийн дүрийг бүтээж байгаа энэхүү жүжигчнийг харах гэж үзэгчид маань тэсэн ядан хүлээж буй биз ээ…

Энэхүү уран сайхны киног тэсэн ядан хүлээж буй кино сонирхогчдод дуулгахад уг “Зэрлэг цэцэгсийн хүлэмж” хэмээх кино наймдугаар сарын 25-нд “Тэнгис” кино театрт нээлтээ хийх гэнэ.