Талбайн теннисний эмэгтэйчүүдийн ээлжит тэмцээн Канадын Торонто хотод энэ сарын 5-11 өдрүүдэд болж байна. 2 сая 369 мянган ам.долларын шагналын сантай “Rogers Cup” тэмцээнд АНУ-ын Серена Уильямс, Польшийн Агнешка Радваньска, Хятадын Ли На, Италийн Сара Эррина нарын шилдгүүд оролцож байна. Тус тэмцээнд ОХУ-ын Мария Шарапова, Беларусын Виктория Азаренка нарын шилдгүүд оролцоогүй.

Тэмцээний хоёрт эрэмбэтэй Польшийн Радваньска гуравдугаар тойрогт шалгараад байна.

Өнгөрөгч долдугаар сард өндөрлөсөн “Уимблдон”-нд түрүүлэх магадлалтай теннисчдийн тоонд зүй ёсоор ороод байсан Радваньска хагас шигшээд Германы Сабини Лицискид ялагдсан. "Уимблдон"-ы хагас шигшээ хүртэл өндөр чансаатай теннисчдээс Радваньска ганцаараа үлдсэн болохоор түүнийг түрүүлнэ гэж спорт сонирхогчид найдаж байсан. “Уимблдон”-д Герман бүсгүй Серена Уильямсыг буулган авсан эрчээрээ шигшээд шалгарсан. Тиймээс энэхүү тэмцээн “Уимблдон”-оос хойш болж буй томоохон тэмцээний нэг.

Энэ жилийн “Уимблдон”-нд өөрөөсөө бага чансаатай теннисчидтэй тоглосоор түрүүлсэн Францын Марион Бартоль тус тэмцээнд оролцож байна. Тэрбээр тэмцээнд долоод эрэмбэлэгдэн тоглож байна. "Уимблдон"-ы аварга Бартолийн хувьд хоёрдугаар тойрогт ОХУ-ын Светлана Кузнецоваг буулган авсан АНУ-ын Дэвистэй оноолт таараад байгаа. Серена Уильямс, Марион Бартоль нар учраагаа буулгасаар шигшээ наймд таарах магадлалтай. Мөн Италийн Сара Эррина, ОХУ-ын Мария Кирилленко нарын тоглолтууд ч сонирхол татаж байна.

Нөгөө хэсэгт Данийн Каролина Возняцки, Австралийн Саманта Стосур, Хятадын Ли На нарын шилдгүүд буй.

Оны хоёр дахь "Их дуулга" болох Францын нээлттэй тэмцээний эхний тойрогт ялагдсанаас хойш тэмцээнд оролцоогүй байсан АНУ-ын Винус Уильямс Канадын тэмцээнд оролцлоо. Винус эхний тойрогт Белгийн Кристен Флипкенстэй оноолт таарсан ч нэг цаг 50 миунт үргэлжилсэн тоглолтод 6:0, 4:6, 2:6-ийн харьцаагаар ялагдал хүлээлээ. Хэдийгээр Винус эхний сэтийг 6:0-оор өөрийн болгосон ч удаах хоёр сэтэд Белги бүсгүй илүү байж дараагийн тойрогт шалгарлаа.

Тэмцээний хосын төрлийг Италийн Сара Эррина, Роберт Винчи нар тэргүүлж байгаа бол ОХУ-ын Екатарина Макаров, Елена Виснина нарын шилдгүүд хоёрт эрэмбэлэгдсэн.

Нийт 2 сая 369 мянган ам.долларын шагналын сантай тус тэмцээний ганцаарчилсан төрлийн аварга 426 мянган ам.доллар хүртэж, чансааны 900 оноо хүртэх бол тэмцээний хоёрдугаар тойрогт шалгарсан тохиолдолд 12 мянган ам.доллар хүртэж, чансааны 70 оноо авах аж.

Харин хосын төрлийн аваргууд 122 мянган ам.доллар хүртэж, чансааны 900 оноо хүртэх юм. Тэмцээн энэ сарын 11-нд өндөрлөнө.

Эмэгтэйчүүд Торонтод өрсөлдөж буй бол эрчүүд Монреаль хотноо өрсөлдөж байна. Тэмцээний нэгд эрэмбэтэй, дэлхийн манлай теннисчин Сербийн Новак Жокович, тэмцээний есд эрэмбэтэй Японы Кей Нишикори нар гуравдугаар тойрогт шалгарчээ. Тус тэмцээнийг Швейцарийн Рожер Федерер өнжсөн бол Их Британий Энди Мюррей, Испанийн Дэвид Феррер, Рафаэль Надаль нарын шилдгүүд оролцож байна.