“A – Capella” интертайнмент болон ССАЖЯ хамтран “Амжилтын эзэд” нэртэй танин мэдэхүй, соёл урлаг, спортын цэнгээнт нэвтрүүлэг хийхээр болжээ. Тус нэвтрүүлэгийн гол оролцогч нь Монгол улсын хөдөлмөрийн баатар, гавьяат тамирчин, Мэргэжлийн сумогийн 68 дахь их аварга Д.Дагвадорж ажээ. Тэрээр сур харваа, усан сэлэлт, гүйлт, туялзуур сэлэм, буудлага, шагай, софт теннис, дугуй, зээрэнцэг шидэлт, уртын харайлт болон волейбол, sport fishing гэсэн спортын 12 төрлөөр тухайн спортын шилдэгүүдтэй өрсөлдөх юм байна. Долоо хоногт нэг удаа 45 минутаар 3-5 телевизийн сувгаар үзэгчдийн хүртээл болох тус нэвтрүүлгээр дамжуулан хүүхэд залуучуудыг зөв төлөвшин хүмүүжихэд тус нэмэр болж, монголын орчин үеийн урлаг, спортыг олон нийтэд таниулж чадна гэдэгтээ зохион байгуулагчид итгэлтэй байгаа аж. Их аваргын анхны өрсөлдөгч нь ойр зайн гүйлтийн тамирчин, ОУХМ Б.Ачитбилэг юм. Б.Ачитбилэгийн хувьд өнгөрөгч долдугаар сард ОХУ-ын Казань хотноо болсон “Универсиад” наадамд 200 м-т монгол улсын рекордыг шинэлэн тогтоосон аж.

Тус нэвтрүүлгийг жүжигчин Н.Ялалт хөтлөх бөгөөд ирэх есдүгээр сарын 20-оос үзэгчдэд хүрэх юм. Мөн спортын төрөл бүрт тохирсон урлагийн тоглолтууд тухай бүрт нь тоглох ажээ.