Удтал дуншиж, Удирдах зөвлөлөө гурвантаа хуралдуулж байж МАН-ын Бага хурал өнөөдөр эхэллээ. Тусгаар тогтнолын ордонд эхэлсэн энэхүү Бага хуралд МАН-ын дарга асан С.Баяр оролцож байгаа нь хамгийн содон сонин мэдээлэл болж, олон нийтэд хүрч байгаа бол хаа холын Австралиас явдал зардал болон эх орондоо ирсэн МАН-ын Ерөнхий нарийн бичгийн дарга асан У.Хүрэлсүх бараагаа ч харуулсангүй. Хэвлэлүүдэд бичсэнээр бол түүний гол найдвар болж байсан “Шинэчилье” хөдөлгөөний залуус нь дотроо хуваагдаж, хүч тарамджээ. Хүчийг сааруулах ажиллагааг намын ахмад гишүүдээс хийсэн гэх яриа ч хүчээ авч эхлэв. Гэвч үүнд нэг их ач холбогдол өгөх хэрэггүй нь. Өнгөрсөн долоо хоногт МАХН-ын дарга Н.Энхбаярт Монгол Улсын Ерөнхийлөгч Ц.Элбэгдорж уучлал үзүүлж, шоронгоос суллагдсан нь МАН-ын зарим нэг фракцийнхны намын удирдлагыг огцруулах төлөвлөгөөнөөсөө няцахаас аргагүйд хүргэсэн байж болох талтай аж. Ямартай ч өчигдөр хуралдсан Удирдах зөвлөлийн хуралдаанаас одоогийн удирдлагыг өөрчлөхгүйгээр Их хуралдаа орох нь зөв гэсэн шийдэл гарсан бол өнөөдөр үдээс өмнө хуралдсан Удирдах зөвлөлийн хуралдаанаар эл асуудал өөрчлөгдсөн эсэх тодорхойгүй ч МАН-ын Бага хурал У.Хүрэлсүхгүйгээр эхэлсэн нь “Шинэчилье” хөдөлгөөний залуус зорилгоосоо няцаж эхэлснийг харуулж байна гэх шүүмжлэлийг араасаа дагуулж эхэллээ.

Үүнийг гэрчлэх мэт “Шинэчилье” хөдөлгөөнийг дэмжигч, УИХ-ын гишүүн Ж.Энхбаяр, тус хөдөлгөөний гишүүн Б.Амарсанаа нарын Бага хуралтай холбоотойгоор өнөөгийн удирдлагыг өөрчлөх асуудал дээр байр сууриа тодорхойлсонгүй, бөөрөнхийлөв. Эндээс энэ удаагийн Бага хурлаас МАН удирдлагаа өөрчлөхгүй, харин Их хурлаа товлох өнгө харагдаж байгаа юм. Мөн Н.Энхбаяр суллагдсан нь У.Хүрэлсүхийн хувьд намаасаа зай барьж, улстөрөөс холхон алхах нь хамгийн зөв гарц болж бууж байгаа бололтой. МАХН-ын дарга Н.Энхбаярын хувьд МАН-ын лидерүүдээс одоогийн дарга Ө.Энхтүвшинтэй л илүү ойлголцож ажиллаж чадах магадлал өндөр. Бусадтай бол тун хэцүү гэх гаргалгаа ч явж байна. Тиймээс энэ удаагийн Бага хурлаас гишүүд Их хурлынхаа товыг гаргах, хоёр шатны сонгуульд ялагдсан шалтгаан юунд байна вэ гэдгийг тодорхойлж гаргах зэрэг ойр зуурын асуудлаа шийдвэрлэж мэдэх нь. Гэхдээ экс дарга С.Баяр энэхүү Бага хуралд ач холбогдол өгч оролцож байгаа нь тооцоолоогүй тоглолтыг гаргаад ирэхийг үгүйсгэх аргагүй байна.

Тэрээр Бага хурал болохоос хэд хоногийн өмнө Сү.Батболдтой биечлэн уулзаж, тус фракцийнхантай нэлээд ойрхон байж гишүүдийнхээ дунд гэнэтийн зочин болж орж ирсэн нь өнөөгийн удирдлагыг дэмжих талд ажиллахаар орж ирснийх үү, эсвэл удирдлагыг гартаа авахаар шийдэв үү гэдгийг тодорхойлоход эрт байгаа юм. Түүнийг МАН-ын дарга Ө.Энхтүвшин өнгөрсөн хугацаанд битүүхэндээ ирнэ гэж хүлээж Тусгаар тогтнолынхоо ордонд тусад нь өрөө бэлтгүүлж, намынхаа ажилд санаа тавьж байх хүсэлтийг илгээсэн ч нааштай хариу өгөөгүй гэх яриа дуулддаг. Харин одоо тэр ирлээ.