Грэмийн шагналт Английн алдарт фолк рок хамтлаг Mumford and Sons  “Hopeless Wanderer” дууныхаа клипийг хөгжим сонирхогчдод хүргэж эхлээд байна. Энэхүү уран бүтээл нь хамтлагийнхны хоёр дахь цомог болох “Babel”-д багтсан бөгөөд илүү инээдмийн өнгө аястай зураглалуудыг гаргасан нь хүмүүст сонирхолтой санагдах бололтой  хэмээн хөгжмийн сувгууд мэдээлж байна.

Таван минут орчим үргэлжлэх уг клиптээ “Mumford and Sons”-ийн залуус нэрт жүжигчин Жейсон Судейки, Жейсон Бейтман, инээдмийн жүжигчин Эд Хелмс нарыг тоглуулжээ. Одоогоор аялан тоглолтоо олон улсад үргэлжлүүлэн яваа хамтлагийнхны “Hopeless Wanderer” сонсогчдын хүртээл болсноосоо хойш залуусыг байлдан дагуулж буй төдийгүй “Babel” цомог ч мөн өнгөрөгч оны Их Британийн хамгийн их борлуулалттай цомгийн тоонд удаа дараа бичигдээд байгаа юм.